kmc bidya

‘आरडिटी पोजेटिभ वयेवं ग्यायेम्वाः, तर सतर्क जुइमाः’ –डा. पूर्णिमा शाक्य

नेवा: अनलाइन न्युज – ललेन्द्र शाक्य | २०७७ जेठ ६, मंगलबार २०:१४:४८

किपू नगरपालिकाय् जनप्रतिनिधि व कर्मचारीपिनिगु कोरोना टेष्ट

‘आरडिटी टेष्ट धैगु ‘हि’या टेष्ट खः, पीसीआर टेष्ट धैगु झीगु म्हगःया ककु दुनेया स्वाब टेष्ट खः । आरडिटी टेष्टय् पोजेटिभ वल धायेवं ग्यायेमाःगु स्थिति मखु । तर सतर्क जुइमाः । अले पीसीआर टेष्ट पोजेटिभ वल धाःसा वयात कोरोना भाइरस संक्रमण जूगु प्रमाणित जुइगु खः । उकिं आरडिटी टेष्टय् पोजेटिभ वयेवं ग्यायेमाःगु खँ मखु ।’

थ्व विचाः किपूया विष्णुदेवी अस्पतालया डा. पूर्णिमा शाक्यं तयादीगु खः ।

कोरोना भाइरस संक्रमणया जोखिम देय् कथं नेपाः नं लायेवं थीथी नगरपालिकाय् आरडिटी व पीसीआर कोरोना परीक्षण ज्याझ्वः न्ह्याःगु दु । थ्वहे झ्वलय् किपू नगरपालिकां नं कोरोना परीक्षणया ज्याझ्वः म्हिगः सोमवाःनिसें न्ह्याकूगु दु ।

थ्वहे झ्वलय् थौं मंगलवाः नं किपू नगरपालिकां नगरपालिकाया जनप्रतिनिधिलिसें कर्मचारीपिनिगु कोरोना परीक्षण याःगु दु ।

किपू नगरपालिकाया भवनय् थौं जूगु कोरोना परीक्षणय् नगरपालिकाया जनप्रतिनिधिलिसें कर्मचारी यानाः मुक्कं ६२ म्हेसिगु कोरोना परीक्षण जूगु खः ।

मुक्कं ६२ म्हेसिगु परीक्षण याःगुलि थौं मंगलवाः न्याम्ह आरडिटी पोजेटिभ खनेदूगु दु । अथेहे, म्हिगः सोमवाः ५२ म्हेसिगु परीक्षण याःगुलि प्यम्ह आरडिटी पोजेटिभ खनेदूगु खः ।

कीर्तिपुर नगरपालिकां थौं मंगलवाः नगरपालिकाया मुक्कं जनप्रतिनिधि व कर्मचारीपिनिगु परीक्षण क्वमचाःगुलिं कन्हय् बुधवाः नं परीक्षण जुइगु जानकारी ब्यूगु दुसा याकनं हे किपू नगर दुनेया संचारमाध्यमया प्रतिनिधिपिनिगु नं कोरोना परीक्षण जुइगु जानकारी ब्यूगु दु ।

कीर्तिपुर नगरपालिकां म्हिगः सोमवाःया कोरोना परीक्षणय् पाजेटिभ आरडिटी पिहाँ वःपिं फोहरमैला विभागय् ज्या याइपिं प्यम्ह कर्मचारीपिनिगु पीसीआर रिपोर्ट कन्हय् बुधवाः जक पिहाँ वइगु जानकारी बिसें आः उपिं प्यम्ह कर्मचारी नगरपालिकाया क्वारेन्टाइन आइसोलेसनय् च्वनाच्वंगु जानकारी बियादीगु दु ।

अथेहे, किपू नगरपालिकां थौं मंगलवाःया परीक्षणय् आरडिटी पोजेटिभ पिहाँ वःपिं न्याम्ह व्यक्तिपिं नं क्वारेन्टाइन आइसोलेसनय् च्वनीगु जानकारी बिसें पीसीआर रिपोर्ट मवःतले अन हे च्वनीगु जानकारी नं ब्यूगु दु ।

थौं किपू नगरपालिकाया संयोजनय् जूगु नगरपालिकाया जनप्रतिनिधि व कर्मचारीपिनिगु कोरोना परीक्षणय् दुथ्याःम्ह किपूया विष्णुदेवी अस्पतालया डा. पूर्णिमा शाक्यं किपू नगरपालिकां म्हिगः सोमवाः व थौं मंगलवाः न्ह्याकूगु कोरोना परीक्षणय् च्याम्ह गुम्ह आरडिटी पोजेटिभ पिहाँ वःगु जानकारी बिसें थथे आरडिटी पोजेटिभ पिहाँ वयेवं आरडिटी पोजेटिभ खनेदूपिं व किपूया बासिन्दापिं आत्ते जुइम्वाःगु व ग्यायेम्वाःगु तर सतर्क जुया च्वनेत इनाप यानादीगु दु ।

डा. शाक्यं आरडिटी पोजेटिभ जूपिनिगु पीसीआर रिपोर्ट पोजेटिभ पिहाँ वल धाःसा जक कोरोना भाइरस संक्रमण पुष्टि जुइगु जूगुलिं लकडाउनयात विशेष ध्यानय् तयाः पालना यायेत व सामाजिक दूरीइ च्वनेत सकल किपूबासीपिन्त जानकारी बियादीगु दु ।

थौं मंगलवाः जूगु कोरोना परीक्षणय् दकले न्हापां किपू नगरपालिका उपमेयर लिसें नगरपालिकाया प्रवक्ता सरस्वती खड्का रिजालं आरडिटी व पीसीआर टेष्ट यानादीगु खःसा वधुंकाः नगरपालिकाया जनप्रतिनिधि व कर्मचारीपिनिगु टेष्ट याःगु खः ।

Categorized in स्थानिय-समाज