nepal investment baink

‘आः बर्खास्तय् लायेधुंकाः वय्कःपिन्सं ज्या यायेदइमखु’ ः संकटा क्लब नायः तुलाधर

नेवा: अनलाइन न्युज – ललेन्द्र शाक्य | २०८० भाद्र २५, सोमबार १३:४०:५२

एन्फा नायः व महासचिवविरुद्ध अविश्वासया प्रस्ताव दर्ता

अखिल नेपाल फुटबल संघ (एन्फा) या नायःविरुद्ध अविश्वासया प्रस्ताव दर्ता जूगु दु ।

संस्थापनइतरया बहुमत दुजःपिन्सं एन्फा नायः व महासचिवविरुद्ध अविश्वासया प्रस्ताव दर्ता याःगु खः ।

एन्फा पुलांम्ह नायः कर्मा छिरिङ शेर्पाया नेतृत्वय् ४८ म्ह दुजःया ल्हाःचिंलिसें सोमवाः नायः पंकजविक्रम नेम्वाङ व महासचिव किरण राईविरुद्ध अविश्वासया प्रस्ताव दर्ता जूगु खः ।

संकटा क्लबया नायः इन्द्रमान तुलाधरं अविश्वासया प्रस्ताव दर्ता याःगु जानकारी ब्यूगु दु ।

उगु पुचलं सोमवाः सुथय् हे इमेलपाखें अविश्वासया प्रस्ताव दर्ता याकूगु व भौतिक रुपं नं एन्फाया बरिष्ठ न्वकू वीरबहादुर खड्कायात अविश्वासया प्रस्ताव लःल्हाःगु तुलाधरं जानकारी ब्यूगु दु ।

अविश्वासया प्रस्ताव दर्ता जुइखतं नायः निलम्बनय् लाइगु जूगुलिं बरिष्ठ न्वकूयात पौ लःल्हाःगु तुलाधरं धाःगु दु ।

संकटा क्लबया नायः तुलाधरं धाःगु दु, ‘जिमिसं नायः व महासचिव निम्हेसिगु विरुद्ध अविश्वासया प्रस्ताव दर्ता यानागु खः । प्रस्ताव दर्ता जुइधुंकाः वय्कःपिं स्वतः निलम्बनय् लाःगु दु । आः बर्खास्तय् लायेधुंकाः वय्कःपिन्सं ज्या यायेदइमखु ।’

प्रस्ताव दर्ता यायेगु नितिं ४० प्रतिशत दुजःपिनिगु ल्हाःचिं दःसा गाःगु व उकियात पारित यायेत निगू तिहाई बहुमत माःगु तुलाधरं धाःगु दु ।

एन्फां विशेष साधारण सभा अनलाइनपाखें यायेगु निर्णय यायेधुंकाः डिभिजन क्लबतसें भौतिक उपस्थ्तििइ हे साधारण सभा यायेमाःगु माग याःगु खः ।

तर एन्फां आइतवाः अनलाइनपाखें साधारण सभा यायेत्यंसां नं बहुमत दुजः उपस्थित मजुइधुंकाः सोमवाःतकया नितिं स्थगित जूगु खः ।

सोमवाः नं संस्थापनइतरया बहुमत दुजःपिन्सं नायः व महासचिवयात हे अविश्वासया प्रस्ताव तयेधुंकाः साधारण सभा सुरु जुइमफूगु खः ।

एन्फा प्रवक्ता सुरेश शाह नं विज्ञप्ति सार्वजनिक यासें एन्फा विशेष साधारण सभा बैठक अनलाइनपाखें च्वनेगु ज्याझ्वः दूगुलि दुजः संस्थातसें विशेष सल्लाह सुझाब ब्यूगु कथं एन्फा नायःपाखें उगु साधारण सभा स्थगित जूगु जानकारी ब्यूगु दु ।

तर बहुमत दुजःपिन्सं धाःसा अविश्वासया प्रस्ताव दर्ता यायेधुंकाः नायः स्वतः निलम्बन जुइगु व आः बरिष्ठ न्वकू नं विशेष साधारण सभा सःतेमाःगु संकटा क्लबया नायः इन्द्रमान तुलाधरं जानकरी ब्यूगु दु ।

‘जिमिसं विशेष साधारण सभा भौतिक उपस्थितिइ हे यायेत माग यानागु खः । थौं नं साधारण सभा वय्कःपिन्सं स्थगित यानादिल । साधारण सभा हे यायेमफइगु स्थितिइ थ्यनेधुंकल,’ तुलाधरं धाःगु दु, ‘विधान अःखः वय्कःपिन्सं ज्या यानादीगु अनुसूची हे जिमिसं पेश यानागु दु । वय्कःपिन्सं दच्छिया दुने यायेमाःगु आपालं कासात यायेमफुत । उकिं वय्कःपिन्त तयातयेबलय् नेपाली फुटबल झन् हे क्वाहाँ वनी धकाः थ्व निर्णय कयागु खः ।’

आः एन्फाया बरिष्ठ न्वकू नं स्वीन्हुया दुने विशेष साधारण सभा सःतेमाःगु व्यवस्था दूगु इन्द्रमान तुलाधरं धाःगु दु ।

Categorized in कासा