zero media family planning adv

‘अस्पतालं तप्यंक बृद्धाश्रमय् वने’ –रामशेखर नकःमि

नांजाःम्ह ख्यालः च्वमि, निर्देशक कलाकार रामशेखर नकःमि छातीइ इन्फेक्शन जुयाः वंगु थ्यंमथ्यं १५ न्हु न्ह्यःनिसें येँया वीर अस्पतालय् भर्ना जुयाच्वनादीगु दु ।
निवाःसिबें अप्वः आइसियुलय् च्वनाः वासः यायेधुंकाः आः वय्कःया स्वास्थ्य सामान्य खःसा थौंकन्हय् वय्कः वार्डय् च्वनाः स्वास्थ्यलाभ यानाच्वनादीगु दु ।
नेवाः अनलाईन न्यूजलिसे म्हिगः असोज ६ गते वय्कलं अस्पतालया बेडय् च्वनाः  यानादीगु खँल्हाबल्हाया सार संक्षेप न्ह्यब्वयाच्वना – सं.

रामशेखर दाईया स्वास्थ्य आः गथे च्वं ?

डाक्टरपिन्सं आःला पाय्छि हे जू धाल । छातीइ इलय् ब्यलय् थथे इन्फेक्शन जुइगु याः । सकसिगु ग्वाहालिं आः स्वास्थ्य पाय्छि हे जू । छन्हुनिन्हु लिपा डिस्चार्ज यायेत्यंगु दु ।

अस्पतालं आःला छेँय् झायादीगु जुइ मखुला ?

छेँय् वनेमखु, बृद्धाश्रमय् वने । तःभुखाय् ब्वयेधुंकाः थःगु छेँय् च्वनेगु स्थिति नं मदु । उकिं जितः बृद्धाश्रम हे पाय्छि जू । इच्छा ला छेँय् वनेगु खः, तर छु याये बाध्य जुयाः बृद्धाश्रमय् च्वनेमाल ।

छेँ दनेगु कुतः यानाः मदियाला ?

ग्व, छु धायेगु , भुखाय् ब्वयाः फुक्कसित हे समस्या वःगु खः । सुइत धायेगु, सुइत मधायेगु । भुखाय् लिपा ला जितः तःधंगु हे समस्या वल । छेँय् काय्पिं नं उखेंथुखें च्वं वन । वधाये थ्वधाये हे मदु ।

बृद्धाश्रमय् गथे च्वं ले ?

सिद्धि स्मृति बृद्धाश्रम बांलाः जू । विचाः याइपिं दु । उकिसनं जितः ग्वाहालि यानाः हे आश्रमय् तयातःगु खः । छुं धायेगु मदु ।

अस्पतालय् वये न्ह्यःला छिं नसात्वसा नयेगु हे त्वःतादिल धाल, गथे खः ?

नये हे मास्ते मवल । उकिं हे मनयागु का ।

चिन्ता अप्वः कयादिया कि छु ?

चिन्ता कयागु मखु, अथें हे चिन्ता वइगु । कायेमखु धाःसां चिन्ता वइगु । वहे मजिल ।

छु चिन्ता जुइगु् ले ?

छु छु चिन्ता का , उगुंथुगुं म्वाःमदुगु मनय् वइगु । वयेके मखु धाःसां हे वइगु का ।

छेँ दनेमाल धैगु चिन्ता वइगु कि ?

छेँ दनेगु चिन्ता नं वइगु ।

चिन्ता कयां जिइला सा ?

जिं न्हाचः धाये धुन नि, चिन्ता कयागु मखु कि चिन्ता वइगु । थ्वहे समस्या का ।

न्हूगु सफू च्वयेगु विचाः नं ला यानाच्वनादीगु दु जुइनि ?

मदु । पासापिन्सं सफू पिकनाः बिइ धकाः धयाच्वंगु खः । तर च्वये हे मफु, ल्हाः खाः । मेपिन्त च्वकां जिइ हे मखु । जिगु साहित्यिक विधा हे मेगु । मेता खँ ला च्वयेगु वातावरण हे मन्त । गुलि याना गुलि च्वया उलि हे का ।

रामशेखर दाईयात नेवाःतय्गु पाखें छु ग्वाहालि यायेमाःथें च्वं ?

छुं हे ग्वाहालि यायेम्वाः । गुलिफु उलि याये  याःगु दु ।  मफू इलय् गथे च्वं धकाः न्यं वयाच्वंगु दु, थ्वहे जिगु लागि धन्य ।