Mohanai 2078 KTM

९१ घौया दुने १०७ म्ह मचा बुइकाः अमेरिकी अस्पतालं तल कीर्तिमान

२०७८ श्रावण १, शुक्रबार ०८:२०:५४

अमेरिकाया टेक्सासय् च्वंगु छगू मिसापिनिगु अस्पतालय् चीहाकःगु इलय् आपालं मचा बुइकूगु कीर्तिमान कायम जूगु दु ।

द एन्ड्रयू वुमन हस्पिटलय् वंगु जुन २४ निसें २८ या मुक्कं ९१ घौया दुने १०७ म्ह मचा बूगु खः । उगु अस्पतालय् थ्वसिबें न्ह्यः न्हिथं औसतय् १६ म्ह मचा बुइगु जुयाच्वंगु उगु प्यन्हुया दुने १०७ म्ह मचा बूगु खः ।

वमध्ये जुन २४ लिपा ४७ घौया दुने ५२ म्ह मचा बूगु खः । अथेहे, जुन २८ य् ४४ घौया दथुइ थप ५५ म्ह मचा बूगु खः ।

अमेरिकाया टेक्सासय् च्वंगु अतिकं चर्चित प्रसूती अस्पतालया रुपं दूगु उगु अस्पतालय् इलय् ब्यलय् छन्हुं हे आपालं मचा बुइगु जुयाच्वंगु जूसां नं थुलिमछि अप्वः मचा बूगु मदुनि ।

अस्पतालया अधिकारीपिनिगु कथं महमारीया लकडाउनया हुनिं प्वाथय् दइगु दरय् वृद्धि जुयाः अस्पतालय् मचा बुइगु क्रमय् नं बृद्धि जूगु खः ।

अस्पतालया प्रसूती नर्स मिचेल स्टेम्लीया कथं न्हापाया दँया क्वारेन्टाइनया ईयात स्वयेबलय् वंगु डिसेम्बर वा जनवरी इलय् अतिकं मचा बुइगु अनुमान याःगु खः । तर उगु इलय् मचा बुइगु क्रमय् खास हे बृद्धि मजुल, गुगु आः वयाः खनेदूगु दु ।