थौं तःभुखाय् दिवस । सरकारं बि.सं. १९९० माघ २ गते ब्वःगु तःभुखाय्या लुमन्तिइ दँय्दसं थुगु दिंयात तःभुखाय् दिवस कथं हनावयाच्वंगु खः । तर थ्वपालय् ९० सालया तःभुखाय् लिपा २०७२ बैशाख १२ गतेया मेगु तःभुखाय् धुंकाः झीगु न्ह्यःने आः १९९० व २०७२ निगू तःभुखाय् न्ह्यःने दंवःगु दु ।

९० सालया तःभुखाय् ब्वःगु इलय् स्वनिगःया स्थिति गथे जुल, थ्व खँयात कयाः चर्चा परिचर्चा आःनं जुयाच्वंगु दनि । अथे खःसां वंगु बैशाख १२ या तःभुखाचं झीतः ९० सालया तःभुखाय्या घटना छुं भच्चा ल्वःमंकाब्यूगु दु ।

१९९० सालया तःभुखाचय् स्वनिगलय् गथे जुल ? थुकिया वर्णन थीथी सफुती थीथी कथं च्वयातःगु दु ।

– माघ २ गते भुखाय् ब्वये न्ह्यः पुस २८ गते तसकं वा वल । चच्छि न्हिच्छि वाः वःगु कारणं सुथसिया हुस्सु अप्वः वल । माघ १ गते घ्यःचाकु सँल्हु जूगु कारणं माघ २ गते तःभुखाय् वःगु इलय् अप्वः मिसात व्रत च्वनाच्वंगु खः । माघ २ गते तःभुखाय् ब्वये न्ह्यः सुथया लकस मेगु दिंसिबें अप्वः तापक्रम दु । निभाः नं तन्न हे त्वयाच्वंगु खः । छेँय्, त्वालय्, चुकय्, बहालय् मनूत आनन्दं निभाः पानाच्वंगु खःसा माघ महिना जूगु कारणं गामय् च्वंपिं बुइँ उत्पादन जूगु तरकारी मीत स्वनिगलय् वइच्वंगु खः । सरकारी अड्डा चाः, पल्टनत कवाज म्हिताच्वंगु ई खः ।

–    १९९० सालया तःभुखाय् पाय्छि न्हिनसिया २ बजे जुया २४ मिनेट २२ सेकेन्डया इलय् ब्वःगु खः । बँ क्वय् ‘गुरुगुरु’ सः वयाः भुखाय् ब्वयेगु सुरु जूगु खः । थथे अजूचायापूगु सः वयेवं गुलिखेस्यां झट्ट भुखाय् ब्वल धकाः धायेमफुत । तर लँ छगुलिं लःपुखूथें सनेवं भुखाय् ब्वःगु वाःचाल । दकले न्हापां भुखाय्या बेग पूर्वं पश्चिम ब्वःगु अनुमान यात । निक्वःगु अवस्थाय् लँ सनाः लँपु फुक्क स्यन । नापनापं छेँत दुन । पुखूया लः थाहां वयाः लँपुइ थ्यन । छेँया खापा, लुखा चायेगु व तीगु जुल । स्वनिगः छगुलिं छेँ दुनाः धुफ्वः दन । येँया फुक्क मनूत बिस्युं वनाः तिंख्यलय् च्वंवन । गुपिं चुकय्, गुपिं बुइँ व खालिगु थासय् च्वनेगु यात । भुखाय् ब्वयाच्वंगु इलय् बिस्युं ववं मनूतसें द्यःया नां काल, उगु इलय् भुखाचं ल्हाःपिं, घाःपाः जूपिं अस्पतालय् यंकेगु ज्या न्ह्यात ।

नेवाः अनलाइनया फाइलं