1142 nhoo dan adv

८१ दँय् ४६ क्वः फेल

२०७२ जेठ २९, शुक्रबार १५:३६:३८

नेपालय् एसएलसीया लिच्वः याकनं हे पिदनेत्यंगु दु । अले दँय्दसं एसएलसीया लिच्वः पिदनेधुंकाः न्यनेमालीगु छगू दुःखद् बुखँ धयागु ब्वमिपिसं याइगु आत्महत्याया खः । जाँचय् छगू वा निगू विषय फेल जुयाः थःगु जीवनयात हे सितिकं छ्वइपिं उज्वःपिनि निंतिं भारतया राजस्थानय् च्वंम्ह ८१ दँ दुम्ह शिवचरण यादव (श्योराम) छगू दसु जुइफु । गुम्हसिनं झिगूगु तगिं पास यायेगु निंतिं आःतक ४६ क्वः जाँच बीधुंकूगु दु, अथेनं ताःलाये मफुनि । थुगुसी राजस्थान शिक्षा बोर्डया झिगू तगिंया जाँचय् ७८ प्रतिशत ब्वमिपिं ताःलाःसां यादव धाःसा ताःमलाः । व ४६ क्वःगु खुसिइ फेल जूगु दु । ८१ दँ दुगुलिं वया लुमन्ति नं उलि बांमलाये धुंकल अथे नं व हारे मचाः ।
अलवरया खोहरी गांया शिवचरण यादव थुगुसी सामाजिक विज्ञान छगू त्वःताः फुक्क विषयलय् फेल जूगु दु । अंग्रेजीइ ला शुन्य नम्बर हःगु दु । खोहरीया डा. नरेश यादवयाकथं शिवचरणं दँय्दसं तसकं मेहनत याइ तर न्ह्याबलें फेल हे जुइ । झिगू तगिं पास जुइकाः जक इहिपाः याये धयाच्वंम्ह वया आःतक इहिपा जुइमफुनि ।
अनया छम्ह शिक्षक कंवर सिंहं मचाबलय् शिवचरण थःपिन्त ब्वनेत ग्वाहालि याइगु व ब्वंकेगु ज्या नं याः । उबलेनिसें हे वं जाँच बियाच्वंगु धयादी ।
छेँय् सुं मदुगुलिं देगलय् च्वनीम्ह वया फिसया व्यवस्था गांयापिसं हे यानाबीगु यानाच्वंगु दु । थम्हं दकलय् म्हो ल्याः हःगु विषयलय् जक ध्यान केन्द्रित यानाः ब्वनीगु जूगुलिं न्ह्याबलें छगू विषय पास जुयाः मेगु विषय फेल जुइगु जुयाच्वंगु दु ।