नेवा: अनलाइन न्युज – ललेन्द्र शाक्य | २०७७ चैत्र ३, मंगलबार ०९:५०:३८

सर्वोच्च शिखर सगरमाथा आरोहणया नितिं बहराइनया राजपरिवारया दुजःलिसें १६ म्हेसिगु पुचः म्हिगः सोमवाः नेपाः थ्यंकूगु दु ।

बहराइन राजपरिवाया दुजःलिसेंया आरोही पुचः विशेष विमानपाखें सोमवाः येँय् थ्यंकूगु आरोहण व्यवस्थापन यानाच्वंगु सेभेन समिट ट्रेक्सया नायः मिंग्मा शेर्पां जानकारी ब्यूगु दु ।

उगु पुचः सोमवाः सनिलया ७ः३० ता इलय् त्रिभुवन अन्तर्राष्ट्रिय विमानस्थल थ्यंकूगु खः । येँया मेरियट होटलय् न्यान्हु क्वारेन्टिन च्वनेधुंकाः गोरखा वनाः अन नं न्यान्हु च्वनेधुंकाः येँय् लिहाँ वइ । वधुंकाः आरोहणया प्रक्रिया क्वचायेकाः आरोही पुचः सगरमाथा आधारशिविर वनीगु ज्याझ्वः तयातःगु दु ।

थ्वसिबें न्ह्यः थौं मंगलवाः बहराइनय् च्वंगु नेपाली राजदूतावासं विज्ञप्ति पिथनाः उगु पुचः अनया ईकथं सुथय् ९ः१५ ता इलय् बहराइन डिफेन्स फोर्सया सैन्य विशेष विमानपाखें नेपाः प्रस्थान याःगु जानकारी ब्यूगु खः ।

आरोही पुचलय् बहराइन राजपरिवारया दुजः शेख मोहम्मद हमाद, मोहम्मद अल खालिफालिसें बहराइन रोयल गार्ड, डिफेन्स फोर्सय् ज्या यानाच्वंपिं १३ म्ह बहराइनी व स्वम्ह बेलायती नागरिक नं दु । उगु पुचm थ्यंमथ्यं ८० न्हुतक नेपाः च्वनीगु जूगु दु ।

उगु पुचलं गोरखाया चुमनुबी गाउँपालिका १ य् च्वंगु समागांया बासिन्दाया नितिं कोरोना भाइरस विरुद्ध बिइगु निद्वः डोज अस्ट्राजेनेका खोप तकं ग्वाहालि कथं बिइगु जूगु दु । पुचःयात बहराइनया नितिं नेपाली राजदूत पदम सुन्दास, नियोगया निम्हम्ह सचिव अरुणा घिसिंग लिसेंया राजदूतावास परिवारं नापलानाः सफलताया भिंतुना ब्यूगु खः ।

अथेहे, बहराइनी पक्षपाखें कमान्डिंग अफिसर अफ द रोयल गार्ड टर्ेनिंग स्कुल, ब्रिगेडियर साद घार्ली मुबारकं नं भिंतुना लिसें बिदाइ याःगु जानकारी ब्यूगु दु ।

उगु पुचलं सन् २०२० या अक्टोबरय् लोबुचे पकि व मनास्लु हिमाल सफलतापूर्वक आरोहण याःगु खः ।

Categorized in राष्ट्रिय