zero media family planning adv

७ म्ह सेनां आदिवासी १४ दँया मिसामचायात सामूहिक बलात्कार

नेवा: अनलाइन न्युज – ललेन्द्र शाक्य | २०७७ आषाढ १४, आइतबार १२:४०:४८

सैनिक देय् व नागरिकया सुरक्षाय् समर्पित जुइ । उकिं इपिंप्रति मनूतय्गु विश्वास आपालं दइ व जुइ । तर, रक्षक हे भक्षक जुइधुंकाः अवस्था छुं नं देसया नितिं चुनौतीपूर्ण जुइ ।

कोलम्बियाय् थथे हे जूगु दु । अनया सैनिकपिन्सं आदिवासी मिसापिन्त यौन दुर्व्यवहार याःगु खँ सार्वजनिक जूगु दु । इमिसं यौन दुर्व्यवहार यानागु कबुल याःगु दु । कोलम्बियाया इम्बेरा कातियोय् च्वनीपिं आदिवासी १४ दँया मिसामचायात ७ म्ह सेनातसें सामुहिक बलात्कार याःगु दु । उम्ह मिसामचाया अपहरण यानाः १७ घौतक बलात्कार याःगु विषय अधिकारीपिन्सं खुलस्त याःगु दु ।

इमित अनुसन्धान जुयाच्वंगु सेना प्रमुखं जानकारी ब्यूगु दु । कोरोनाया रोकथाम व नियन्त्रण यायेत उत्तर पश्चिमय् च्वंगु इम्बेरा कातियो क्षेत्रय् सैनिक खटेयाःगु खः । सैनिकतसें मौकाया गलत फाइदा कयाः आदिवासी मिसामचाया अपहरण यानाः बलात्कार याःगु खः ।

बलात्कारया घटना क्षेत्रय् आइतवाः घटेजूगु खः । मानव अधिकारवादीपिन्सं इम्बेरा कातियो समुदायया प्रमुखयात उगु घटनाया विषयस जानकारी ब्यूगु धाःगु दु । बलात्कृत मिसामचाया मांम्हं मालेगु झ्वलय् वया पासापिन्सं मिसामचायात लुइकूगु खः । बलात्कृत मिसामचाया अवस्था अतिकं गम्भीर जूगु हुनिं वयात अस्पतालय् भर्ना याःगु दु ।

क्रुरतापूर्वक याःगु अपराधं कोलम्बियाय् आक्रोश ब्वलंगु दु । अपराधीपिन्त जन्मकैदया सजाय जुइगु प्रवल सम्भावना खनेदूगु दु ।

थुगु कथंया घटना महामारीया इलय् अतिकं गम्भीर जूगु व महामारी सिबें नं खतरनाक जूगु जानकारी ब्यूगु दु ।

थुगु दँ कोलम्बियाय् ८ हजारसिबें अप्वः मिसा व मिसामचात जबरजस्ती करणीइ फसेजूगु रिपोर्ट दर्ता जूगु कोलम्बियन फेमिसाइड फाउण्डेशनं जानकारी ब्यूगु दु । वमध्ये ५ हजारसिबें अप्वः १८ दँसिबें म्हो उमेरया मिसापिं जूगु जानकारी ब्यूगु दु ।

Categorized in अन्तर्राष्ट्रिय