1142 nhoo dan adv

३ वडा किपू ज्याकुथिं चिहाः संकिपा ‘कीर्तिमान’ दयेकीगु, शुक्रवाः सुथय् भिं–साईत

नेवा: अनलाइन न्युज – ललेन्द्र शाक्य | २०७८ मङ्सिर १, बुधबार ०७:२९:३१

किपू नगरपालिका ३ वडा ज्याकूया निर्माण व्यवस्थापनय् ज्येष्ठ नागरिकपिन्त समर्पित यथार्थ चिहाः संकिपा ‘कीर्तिमान’ दयेकीगु जूगु दु ।

ने.सं. ११४२ कछलाथ्व पुन्ही (मंसीर ३ गते) शुक्रवाः किपूया ३ वडा दुनेया ज्येष्ठ नागरिकपिन्त लुम्बिनी लिसेलिसें भारतया गोरखपुरतक देश दर्शन भ्रमण यंकेगु ग्वसाः ३ वडा ज्याकुथिं ग्वःगु दु । उगु भ्रमणया झ्वलय् दयेकेत्यंगु ज्येष्ठ नागरिकपिन्त समर्पित यथार्थ चिहाः संकिपा ‘कीर्तिमान’या भिं–साईत ज्याझ्वः नं जुइगु ग्वसाः किपू ३ वडा ज्याकुथिं ग्वयातःगु दु ।

देश दर्शन भ्रमण वनेगु नितिं मुनेगु थाय् किपूया ३ वडा खासिबजाः धःपाः वनेगु दुपाः वडा भवन न्ह्यःनय् मंसीर ३ गते शुक्रवाः सुथसिया ६ ता इलय् किपू नगरया प्रमुख रमेश महर्जनया ल्हाःतं उगुु चिहाः संकिपा ‘कीर्तिमान’या भिं–साईत जुइगु जानकारी किपू नगरपालिका ३ वडाया वडाध्यक्ष राजेन्द्र महर्जन जानकारी बियादीगु दु ।

वडाध्यक्ष भाजु महर्जनं बियादीगु जानकारी कथं उगु ज्येष्ठ नागरिकपिन्त समर्पित यथार्थ चिहाः संकिपा ‘कीर्तिमान’या परिकल्पनाकार किपू ३ वडाया हे संचारकःमि ज्ञानकुमार महर्जन खःसा बाखं किपूया शिक्षाविद् जुजुभाई महर्जनं च्वयादीगु दु । अथेहे, चिहाः संकिपा ‘कीर्तिमान’या किपालुमि प्रताप महर्जन व सम्पादन निर्देशन किपूया संचारकःमि ललेन्द्र शाक्यं यानादीगु जानकारी संकिपा निर्माण व्यवस्थापन ३ वडा ज्याकुथिं ब्यूगु दु ।

वडाध्यक्ष राजेन्द्र महर्जनं आःयात संकिपा दुनेया कलाकारपिं गोप्य हे तयेगु व देश दर्शन भ्रमणया झ्वलय् संकिपाया कलाकारपिं नं दुथ्याइगु लिसें संकिपायात माःगु लू उगु भ्रमणया झ्वलय् नं छायांकन जुइगु जानकारी बियादीगु दु ।

वय्कलं संकिपाय् किपू ३ वडा कुतिसा त्वाःया नांजाःम्ह संगीतकःमि ज्ञानेश्वर निभाः नं दयेकातःगु छपू ज्येष्ठ नागरिकपिंलिसे स्वापू दूगु म्ये नं दुथ्याइगु जानकारी बियादिसें संकिपाया छुं छुं ब्व लुम्बिनी, भारतया गोरखपुरय् छायांकन यानाः अनं लिपा फुक्क किपू लागाय् हे छायांकन यायेगु खँ कनादीगु दु ।

देश दर्शन भ्रमण पुचः मंसीर ३ गते शुक्रवाः वनाः आइतवाः लिहाँ वइगु जूगु दु ।

लुमंकेबहःजू, किपू नगरपालिका ३ वडा ज्याकू छगू उज्वःगु ज्याकू खः, वडाया जनप्रतिनिधिपिनिगु कार्यकाल फुइत्यंगु दु । किपू लागाय् वडास्तरं ज्येष्ठ नागरिकपिन्त न्यादँया दुने दँय् दसं ज्येष्ठ नागरिकपिन्त देश दर्शन भ्रमण यंकूगु व दकले न्हापां किपू लागाय् वडापाखें ज्येष्ठ नागरिकपिन्त देश दर्शन भ्रमणय् यंकेगु ज्या ३ वडापाखें हे न्ह्याःगु खः । आः थ्व लुम्बिनी, गोरखपुर देश दर्शन भ्रमण जनप्रतिनिधिपिनिगु कार्यकालया लिपांगु दँ न्यादँया भ्रमण खः ।

चिहाः संकिपा ‘कीर्तिमान’ छगू सन्देशमूलक यथार्थ प्याखं जुइगु धारणा तसें दकलें लिपा संकिपा निर्माण व्यवस्थापन याःम्ह ३ वडा ज्याकूया वडाध्यक्ष राजेन्द्र महर्जनं समाजय् सु उत्कृष्ट मांअबु व सु उत्कृष्ट काय् खः धैगु प्रमाण व समाजयात न्ह्यलं चायेकेगु कुतः थुगु ‘कीर्तिमान’ चिहाः संकिपां याइगु खँ कनादीगु दु ।

Categorized in कला