kmc bidya

२४ सयम्हया भीड दुने प्यम्ह कोरोना संक्रमित

नेवा: अनलाइन न्युज – ललेन्द्र शाक्य | २०७७ जेठ १०, शनिबार २०:१०:४३

कैलालीया गौरीफन्टा नाकां बिहिवाः २५०० म्ह मनूतलिसें भारतं नेपाः दुहाँ वःपिं प्यम्हेसिके कोरोना संक्रमण पुष्टि जूगु दु ।

बिहिवाः नेपाः लिहाँ वयेगु झ्वलय् कोरोनाया लक्षण लुयावयेधुंकाः तप्यंक कैलालीया सेती प्रादेशिक अस्पताल यंकूपिं २२ म्हमध्ये प्यम्हेसिके कोरोना संक्रमण पुष्टि जूगु खः । ल्यंदुपिं १८ म्हेसिगु रिपोर्ट वये ल्यंदनीगु सेती प्रादेशिक अस्पतालया सुचं अधिकारी दिलीप श्रेष्ठं जानकारी ब्यूगु दु ।

सलंसःया भीडय् लाःपिं मनूतय्त कोरोना संक्रमण खनेदयेधुंकाः आः सुदूरपश्चिम प्रदेशय् ग्याःचिकु ब्वलंगु दु । बिहिवाः सीमापाखें नेपाः दुहाँवःपिं २४९८ म्हमध्ये ६०० म्हेसिगु जक रापिड डाइग्नोस्टिक टेष्ट (आरडिटी) विधिपाखें कोरोना परीक्षण याःगु खः ।

शनिवाः संक्रमण पुष्टि जूपिं प्यम्हं बैतडीया शिवनाथ गाउँपालिकाया खः । शिवनाथ गाउँपालिका १ वडाया २७ व २० दँया व वडा ल्याः २ या २२ व ३० दँया मिजंपिंके संक्रमण पुष्टि जूगु श्रेष्ठं जानकारी ब्यूगु दु । इपिं प्यम्हं आः सेती प्रादेशिक अस्पतालया आइसोलेसनय् च्वनाच्वंगु दु ।

थ्वसिबें न्ह्यः नं सुदूरपश्चिम प्रदेशय् न्याम्हेसिके कोरोना संक्रमण पुष्टि जूगु खः । कैलालीया जानकी गाउँपालिकाया स्वम्ह, डडेल्धुराया परशुराम नगरपालिकाया छम्ह व बैतडीया शिवनाथ गाउँपालिकाया छम्हेसित शुक्रवाः संक्रमण खनेदूगु खः । इमिगु टीकापुर, डडेल्धुरा व बैतडी अस्पतालय् वासः जुयाच्वंगु दु ।

Categorized in राष्ट्रिय