city axpris 2

२१ म्ह इजरायली सैनिक सित गाजा हमलाय्

नेवा: अनलाइन न्युज – ललेन्द्र शाक्य | २०८० माघ १०, बुधबार १२:०१:४०

इजरायली सेनां मंगलवाः मध्य गाजाय् जूगु आक्रमणय् २१ म्ह सैनिक स्याःगु घोषणा यासें उगु घटना १ सय ९ दिंया युद्धय् सेनाया नितिं दकले घातक घटना जूगु जानकारी ब्यूगु दु ।

छगू पत्रकार सम्मेलनय् इजरायली रक्षा बलया प्रवक्ता डेनियल हागारीं सैनिकपिन्सं निगू भवन ध्वस्त यायेत विस्फोटक तयारी यानाच्वंगु धाःगु दु । आतंककारीपिन्सं सोमवाः लिक्क च्वंगु ट्यांकय् रकेट – प्रोपेल्ड ग्रेनेड प्रहार यायेधुंकाः ई न्ह्यः हे विस्फोट जुल , गुकिया लिच्वः कथं भवनत क्वःदल, सैनिकपिं दुने व लिक्क लानाच्वंगु खः ।

सेनां छगू विज्ञप्तिइ दुर्घटनाय् लाःपिं २२ निसें ३७ दँ उमेरया रिजर्भ सैनिकपिं जूगु धाःगु दु । थ्व घटना अक्टोबर ७ य् गाजाय् हमास विरुद्धया युद्ध न्ह्यायेधुंकाया इजरायली सेनायात जूगु दकलेघातक एकल आक्रमण खः ।

Categorized in अन्तर्राष्ट्रिय