kmc bidya

२० म्ह म्येहालामिपिनिगु छपू मंकाः म्ये यूट्युबय् पिदनीगु

नेवा: अनलाइन न्युज – विजयरत्न | २०७७ बैशाख २६, शुक्रबार ११:३४:५१

संकिपा व संगीत ख्यःया छम्ह नांजाःम्ह कलाकःमि सुरेन्द्र तुलाधरया कुतलय् छपू मंकाः म्ये पिदनीगु जुउगु दु ।

“जः दया नं छाय् ख्युंसे थन... ” बोलया थ्व म्येय् नेपालभाषाया संगीत ख्यलय् नांजाःपिं २० म्ह म्येहालामिपिन्सं थःथःगु सः बीगु खँ दु ।

कलाकःमि सुरेन्द्र तुलाधरं च्वयादीगु थ्व म्ये संगीतकार नील शाक्यं लसय् हनादीगु खःसा थ्व म्येय् अमरराज शर्मा राजोपाध्याय्, जुजुकाजी रञ्जित, एन्जिला श्रेष्ठ, पवित्र कसाः, सञ्जिप प्रधान व सरिश्मा अमात्य, निशा देसार, भुपेन्द्र बज्राचार्य, दिपा महर्जन, रवि हाडा, जिवित जल्मी, लसता जोशी, नील शाक्य, राजेश महर्जन, सतिश महर्जन, सुरेन्द्र श्रेष्ठ, सरिता शाही, रत्नशोभा महर्जनया नापनापं मदनकृष्ण श्रेष्ठया काय् यमन श्रेष्ठ  नापनापं थ्व म्येया परिकल्पनाकार व च्वमि सुरेन्द्र तुलाधरया नं सः दइगु ग्वसाः जुउगु दु ।

देश थौंकन्हे लकडाउनय् लानाच्वंगु थ्व इलय् कलाकारपिनिगु सृजनायात छेँय् दुने जक लिकुंकाः तयेमजिउ धइगु विचाः ज्वना “जः दया नं छाय् ख्युंसे थन... ” बोलया थ्व म्येय्या परिकल्पना सुरेन्द्र तुलाधरं यानादीगु खःसा थुकिया निंतिं म्येहालामिपिं थःथःगु हे छेँय् च्वना तयारी याना च्वनादीगु खँ थ्व म्येया लय् चिनामि नील शाक्यं जानकारी बियादिल ।

संगीतकःमि भुपेन्द्र बज्राचार्यया संगीत संयोजनय् रेकर्डिष्ट सुरेन्द्र श्रेष्ठं सूर मेलोडी रेकर्डिङ्ग स्टुडियोय् थ्व म्येया फाइनल मिक्सिंग जुइसा म्येहालामिपिन्सं थःथःगु हे छेँय् च्वना रेकर्डिंग याना छ्वया हइ धकाः लय् चिनामि शाक्यं कनादिलसा थ्व म्येया म्युजिक भिडियो धाःसा युट्य्बया माध्यमं सार्वजनिक जुइगु खँ परिकल्पनाकार सुरेन्द्र तुलाधरं कनादिल ।

उगु म्युजिक भिडियो मेरो टेलिभिजन नांयागु युट्यबया नापनापं सुरेन्द्र तुलाधरया थःगु युट्युुबय् रिलिज जुइगु खँ दु  ।

Categorized in कला