१ लख ४५ हजार पुल भारतय् कोरोना संक्रमितया ल्याः
नेवा: अनलाइन न्युज – ललेन्द्र शाक्य | २०७७ जेठ १३, मंगलबार १२:१८:३४
भारतय् कोरोना भाइरस कोभिड १९ पाखें संक्रमित जूपिनिगु ल्याः १ लख ४५ हजार पुलेधुंकूगु दु ।
भारतया स्वास्थ्य मन्त्रालयया कथं आःतक भारतय् कोरोना भाइरसपाखें संक्रमित जूपिनिगु ल्याः १ लख ४५ हजार ३८० म्ह थ्यंगु दु । लिपांगु २४ घौ दुने भारतय् ६ हजार ५३५ न्हूपिं संक्रमित लुयावःगु खः ।
अथेहे, भारतय् आःतक कोरोना भाइरसपाखें सीपिनिगु ल्याः नं ४ हजार १६७ म्ह थ्यंगु दु । लिपांगु २४ घौ दुने भारतय् कोरोनाया हुनिं १४६ म्ह सीगु खः ।
भारतया दकले अप्वः लिच्वः लाःगु राज्य महाराष्ट्रय् आःतक कोरोनापाखें संक्रमित जूपिनिगु ल्याः ५२ हजार ६६७ म्ह थ्यंगु दु ।
महाराष्ट्रय् आःतक १ हजार ६९५ म्ह कोरोनाया हुनिं सीधुंकूगु दु ।
अथेहे, तमिलनाडुइ आःतक १७ हजार ८२ म्हेसिके कोरोना भाइरस संक्रमण खनेदुबलय् ११८ म्ह मनूत सीधुंकूगु दु । गुजरातय् आःतक १४ हजार ४६० म्ह संक्रमित थ्यंगु दु । थ्व राज्यय् सीपिनिगु ल्याः नं ८८८ म्ह थ्यंगु दु ।
मध्य प्रदेशय् संक्रमितया ल्याः ६ हजार ८५९ थ्यंगु दु । थ्व राज्यय् ३०० म्ह सीधुंकूगु दु ।
भारतया पश्चिम बंगालय् ३ हजार ८१६ संक्रमित थ्यंगु दुसा सीपिनिगु ल्याm २७८ थ्यंगु दु ।
उत्तर प्रदेशय् नं संक्रमित ल्याः ६ हजार ५३२ म्ह थ्यंगु दु । थुगु प्रदेशय् आःतक कोरोनापाखें १६५ म्ह सीधुंकूगु दु ।
विहारय् २ हजार ७३० म्ह संक्रमित थ्यंबलय् १३ म्ह सीधुंकूगु दु ।
भारतय् आःतक ६० हजार ४९१ म्ह संक्रमित वासः यानाः लंकाः छेँय् लिहाँ वनेधुंकूगु दु ।
Categorized in अन्तर्राष्ट्रिय