dudha jayanti 2568

१६ बुँदे हिसाबकिताब बुझे यायेत भारत भ्रमण

अजय

झलनाथ खनाल प्रचण्डया चटकं प्रधानमन्त्री ला जुल, तर वयात भारतं मसःतू अर्थात् मान्यता मब्यू । स्वलाया दुने हे त्वःतेमाःगु अवस्था जुल । तर थ्व ला व्यक्ति छम्ह प्रधानमन्त्री जूगु सवाल जुल, तर १६ गू बुँदे सम्झौता ला व्यापारी छम्हेसिया मध्यस्थताया भरय् एमाले–एमाओवादी मिले जुयाः अले कांग्रेसयात नं राष्ट्रपतिया भाग छिमिगु हे खः धकाः जुल । १६ गू बुँदे सम्झौतां नेपालय् खस राष्ट्रवादयात सुरक्षित यानाः प्रदेशया नामं क्वय् च्वंपिन्त च्वकि ह्वलेगु कथं जुल । थुकथं जूबलय् मधेशवादी दलतसें भारतीय दूतावासय् उजुरी तल । आः थुकिया वास्तविक हिसाब किताब छु खः धकाः बुझे यायेत प्रचण्डया भारत भ्रमण जुल । अनंलि कांग्रेसपाखें शेरबहादुर देउवा व रामचन्द्र पौडेल अले एमालेपाखें माधव नेपालया नां दु । खास खँ छु ले धायेबलय् थ्वय्कःपिं सकलें भारतनाप दुबिस्ता मब्याःपिं नेतात खः । थुमिगु भारतनापया सम्बन्ध धइगु ‘आन्तरिक’ सिकं नं औपचारिक खः । 

वास्तवय् १६ गू बुँदाया सम्झौता धइगु नेपालय् दुनेया नेतातय्गु स्वार्थया गठजोडया लिच्वः खः । थुकी भारतया गुगुं भूमिका खनेमदु । अथेजूगुलिं भारतं थुकी स्पष्टीकरण कायेत स्वत । राष्ट्रियताया दृष्टिकोणं थ्व पाय्छि मजूसां न्ह्यानाच्वंगु राजनीतिया दृष्टिं थ्व स्वाभाविक खँ खः । 

भारतं थुकथं स्पष्टीकरण कायेत्यंगु खनाः उत्साहित जुयाः हे जुइमाः तमलोपा थुज्वःगु दलतसें येँय् ‘रिहर्सल’ यानाः तराई नं फिल्म क्यनेगु धकाः उद्घोष याःगु दु । मेखे राष्ट्रपति स्वयं नं म्होतिं नं सीमांकन सहितया संघीयता माः धकाः धयाच्वंगु दु । मेखे सर्वोच्च अदालतं ब्यूगु अन्तरिम आदेश नं दहे दु । 

थथे जूगुलिं १६ गू बुँदाया सम्झौता याःपिं छथ्वः थुकियात याकनं हे क्वचायेकाः संविधान जारी याकेगु खँय् दु धाःसा मेखे संविधानय् संघीयताया नामांकन व सीमांकनयात निश्चित यानाः जक संविधान जारी जुइमाः धाइपिं मनूत नं सक्रिय जुयावःगु खनेदु । 

आः भारतय् वंपिं नेतातसें गुकथं खँ थुइकीगु खः, गुकथं भारतया राय वइगु खः व स्वयेगु ल्यं हे दनि ।