zero media family planning adv

१३ क्वःगु साग : थौं आइतवाःनिसें जुडो कासा जुइगु

नेवा: अनलाइन न्युज | २०७६ मङ्सिर २२, आइतबार १०:०८:०३

१३ क्वःगु दक्षिण एसियाली खेलकुद (साग) अन्तर्गत नेपालं स्वर्णपदक त्याकीगु आशा यानातःगु कासा जुडोया धेंधेंबल्ला थौं आइतवाःनिसें जुइगु जूगु दु ।

यलया लवंख्यलय् च्वंगु नेपाली सेनाया शारीरिक तालिम व खेलकुद प्रशिक्षण केन्द्रय् जुइगु जुडो कासाय् छुं कासाया स्वर्ण छिनोफानो जुइ ।

जुडो कासाय् मिसापाखे ४८ केजी क्वये, ५२ केजी क्वय्, ५७ केजी क्वय् व ६३ केजी क्वय् समूहलय् धेंधेंबल्ला जुइ । अथेहे, मिजपाखे ६० केजी क्वय्, ६६ केजी क्वय् व ७३ केजी क्वय् तौल समूहय् धेंधेंबल्ला जुइ ।

अथेहे, सातदोबाटोय् न्ह्यानाच्वंगु लाल कासा (पौडी)इ थौं आइतवाः ८ गू स्वर्णया नितिं धेंधेंबल्ला जुइ । गुकी ४०० मिटर फ्रिस्टायल मिजं व मिसा, २०० मिटर बटरफ्लाई मिजं व मिसा, ५० मिटर ब्याकस्ट्रोक मिजं व मिसा व ४ गुणा २०० मिटर फ्रिस्टायल रिलेय् धेंधेंबल्ला कासा जुइ ।

थ्वहे झ्वलय् सातदोबाटोय् हे बक्सिङया कासा नं जुइ । बक्सिङय् थौं आइतवाः नं सेमिफाइनल राउण्डया कासा जुइ । गुकी नेपालया ५ म्ह कासामिं म्हिती । नेपालं माला राई नं मिसा ५१ केजी, चन्द्रकला थापां मिसा ५७ केजी, तेजबहादुर देउवां मिजं ५२ केजी, सनिल शाहीं मिजं ६० केजी व गणेश प्रधानं मिजं ८१ केजीइ धेंधेंबल्ला याइ ।

अथेहे, सातदोबाटोय् सुटिङ, टेनिस व स्क्वास कासा नं निरन्तरता काइ । स्क्वास कासाय् थौं मिसा व मिजंया फाइनल कासात जुइ । अथहे, किपूया कभर्ड हल खेल मैदानय् जुइगु फेनिसिङय् थौं आइतवाः स्वंगू धेंधेंबल्ला फाइनल कासा जुइ ।

बास्केटबलपाखे नेपाःया मिसा व मिजं निगुलिं टिमं थौं आइतवाः कासा म्हिती । मिजं टिमं सुथय् १०ः३० ता इलय् माल्दिभ्सलिसे व मिसा टिमं न्हिनय् ३ ता इलय् भुटानलिसे धेेंंधेंबल्ला याइगु जूगु दु ।

Categorized in कासा