zero media family planning adv

ह्याउँख्वाः मिसा...या म्युजिक भिडियो पिदन

नेवा: अनलाइन न्युज – ललेन्द्र शाक्य | २०७७ माघ २५, आइतबार १६:३५:५२

नेपालभाषाया लोकंह्वाःगु टिभि प्रोग्राम  समयबजिया लोकंह्वाःम्ह कलाकार रेवन्तलाल श्रेष्ठ आः छम्ह म्येहालामि कथं नं पिलू वःगु दु ।

कलाकार श्रेष्ठं हालादीगु ह्याउँख्वाः मिसा... म्येया म्युजिक भिडियो आइतवाः छगू ज्याझ्वःया दथुइ पितब्वज्या याःगु दु ।

छन्त जि धाथें यःगु खःसा... थेंज्याःगु लोकंह्वाःगु आपालं म्ये हालादीम्ह नांजाःम्ह म्येहालामि जुजुकाजि रन्जितया मूपाहाँसुइ पितब्वज्या जुउगु ज्याझ्वलय् नेपालभाषाया न्हापांम्ह म्युजिक भिडियो निर्देशकलिसें बरिष्ठ सिने पत्रकार व निर्देशक विजयरत्न असंबरें पितब्वज्या जुउगु म्येया समीक्षा यानादिसे म्ये ख्यालि न्हिलिं जाःगु व रेवन्तलाल श्रेष्ठया अभिनय व सुरेन्द्र मानन्धर बागदाईया निर्देशनं म्येयात छायेपियातःगु च्वछायेबहः जुगु नुगःखँ कनादिल ।

ज्याझ्वलय् उगु म्येया परिकल्पनाकार व निर्देशक सुरेन्द्र मानन्धर बागःदाई नं लसकुस न्वचू तयेगु झ्वलय् सकसिया कुतलय् छपू बाँलाःगु म्ये पिहाँ वल धकाः धयादिलसा ज्याझ्वलय् नेवाः पत्रकार राष्ट्रिय दबूया नायः सुरजबीर बज्राचार्यं नं भिन्तुना न्वचू तयादिल ।

पितब्वज्या जुउगु म्येया च्वमि व लय चिनामि विष्णु जलःमि, बाजं ग्वसाः जिवित जलःमि, किपालुमि आयुष महर्जन, सम्पादन इन्द्र मानन्धरं यानादीगु खः ।

म्येहालामि रेवन्तलाल श्रेष्ठं हे मू भूमिका म्हितातःगु थ्व म्येय् रबिता बके श्रेष्ठ, सना शाक्य, सुरेश मानन्धर, दिब्यरत्न बज्राचार्य, लक्ष्मीनाथ मदगलिया व सुरेन्द्र मानन्धर बागःदाईपिन्सं नं अभिनय यानादीगु दु ।

Categorized in कला