1142 nhoo dan adv

होशियार, फेसबुकय् लाइक यायेन्ह्यः सोचे यानादिसँ

२०७२ भाद्र २९, मंगलबार १०:०३:३७

थः पासापिन्सं फेसबुकय् तयातःगु किपाः, भिडियो, छुं नं पेज वा मेगु छुं लाइक यायेगु सामान्य खँ खः । तर क्याम्ब्रिज विश्वविद्यालयं आः नकतिनि जक धाःगु दु कि फेसबुकय् याःगु लाइकपाखें हे लाइक याःम्ह मनूया बारे यक्व खँ लुइके फु धकाः ।
अगस्ट २४ तारिखय् छन्हुं हे १०० करोड मनूतसें फेसबुक चले यात । आः फेसबुकय् विश्वन्यंकंया डेढ अरब मनूत स्वानाच्वंगु दु । झीपिं फेसबुकय् थः परिवार व पासापिंनाप स्वानाच्वंगु दु । झीसँ सामान्य सोचे यानाः यानागु लाइकं गबलें गबलें झीतः तःधंगु संकटय् नं लाकेयः । क्याम्ब्रिज विश्वविद्यालयया साइकोमेट्रिक्स सेन्टरयाकथं छगू म्याजिक सौस टूलपाखें फेसबुक पोष्टय् याःगु लाइकपाखें छिगु बारे आपालं आपाः हे खँत लुइके फइ । छि मिजं जुइमा वा मिसा । छिगु धर्म, राजनीतिक विचाः व थुज्वःगु मेगु यक्व खँत गुगु कि छिं गोप्य दु धकाः सोचे यानादीगु खँत, व फुक्क लुइकी ।
क्याम्ब्रिज विश्वविद्यालयया साइकोमेट्रिक्स सेन्टरय् पिएचडी यानाच्वंम्ह छम्ह विद्यार्थी उ यू यूं आः नकतिनि जक थुगु सम्बन्धय् अनुसन्धानतकं यानादीगु दु । उम्ह विद्यार्थीं ८६ हजार फेसबुक चलेयाइपिनिगु दथुइ याःगु अनुसन्धानकथं फेसबुकय् याःगु लाइकं सफ्टवयरपाखें फेसबुक चलेयाइपिनिगु व्यक्तित्व, इमिगु परिवार व पासापिन्सं मस्यूगु आपालं आपा खँत लुइकल अर्थात् सीकल । अनुसन्धानं सीदूगु दुकि छम्ह सामान्य फेसबुक चलेयाइम्हं २२७ गू फरक पेजतय्के सामान्यकथं लाइक याःगु जुइ ।
थ्व फुक्क जानकारी फेसबुकय् हे दइ, थ्व उलि तःधंगु खँ मखु धैगु सोचे यानादी तर छिगु बारे सुनानं जानकारी काये चाहे जू अले व अःपुक काये खनीसा थ्व खँ उलि सहज मखु । उकिं फेसबुकय् लाइक बटन थिचे याये न्ह्यः सोचे यानादिसँ । सोसियल मिडियाय् गुलि फु उलि म्हो जक जानकारी बिइत अनुसन्धानकर्तापिन्सं सुझाव ब्यूगु दु ।