zero media family planning adv

होली पर्व : निद्वः सवारीसाधनयात कारवाही

नेवा: अनलाइन न्युज | २०७६ फाल्गुण २७, मंगलबार १२:००:०७

ट्राफिक प्रहरीं होली पर्वया झ्वलय् स्वनिगलय् ट्राफिक नियम उल्लंघन याःगु १,९४१ गः सवारीसाधनयात कारवाही याःगु दु । महानगरीय ट्राफिक प्रहरी महाशाखां होली पर्वया झ्वलय् लाकाः लाक्वपाक्व सवारी चलेयाःपिं चालकपिन्त कारवाही याःगु खः ।

कारवाहीलय् १,६४५ निचाः पांग्रे व २९६ प्यचाः पांग्रे सवारीसाधन लाःगु खः । महाशाखाया प्रमुख प्रहरी बरिष्ठ उपरीक्षक भीमप्रसाद ढकालं मादक पदार्थ सेवन यानाः सवारी चलेयायेगु क्षमतासिबें अप्वः तयाm सवारी चलेयाःपिं, मोटरसाइकलय् स्वम्ह तयाः चलेयाःपिं व तसकं सः पिकयाm तीव्र गतिइ चलेयाःपिं चालकपिन्त कारवाही याःगु जानकारी ब्यूगु दु ।

ट्राफिक प्रहरीं होली पर्वया झ्वलय् सुथय् ७ ता ईनिसें सनिलया ७ ता ईतक ७६ गू थासय् विशेष जाँचया व्यवस्था याःगु लिसें १४ गः मोबाइल भ्यानपाखें तकं जाँच याःगु खः । महाशाखाया प्रवक्ता, प्रहरी उपरीक्षक जीवनकुमार श्रेष्ठं होलीया यलय् तःधंगु दुर्घटना मजूसां नं २० गू दुर्घटना जूगु जानकारी ब्यूगु दु । उगु दुर्घटनाय् १९ म्ह सामान्य घाःपाः जूगु दु । ५६६ म्ह ट्राफिक प्रहरीयात ज्याय् खटेयाःगु खः ।

Categorized in दुर्घटना-अपराध