prabhu baink new

होटल क्वारेन्टिन : गेष्टहाउस व तारे होटलया मू उलि हे

नेवा: अनलाइन न्युज – ललेन्द्र शाक्य | २०७७ भाद्र ६, शनिबार १५:१२:५५

  • होटलयात क्वारेन्टिनया रुपं छ्यलेत स्थानीयबासीलिसे नं समन्वय जुइमाःगु शर्त
  • सरकारं क्वःछ्यूगु मापदण्ड पालना मयाःसे होटल संचालन यायेदइमखु
  • होटलयात उगु शर्त पालना याकेत धाःसा हाथ्याया विषय जूगु दु

सरकारं न्यागूगु चरणया उद्धार उडान सुरु याःगु हे दिं भाद्र १ गते नेपाःमि श्रमिक कायेत दुबई थ्यंकूगु नेपाल वायु सेवा निगमया हवाईजहाज खाली हे लिहाँ वल । विमानयात खालि जक लिछ्वयाहःगु मखु मि उद्धार उडान हे बन्द यात ।

कोभिड १९ संकट व्यवस्थापन केन्द्र (सीसीएमसीं) नेपाः लिहाँ वयेत आतुर जुयाच्वंपिं नेपाःमि श्रमिकपिन्त येँय् होटलया व्यवस्था जुइमफूगु धासें विमानस्थलपाखें हे लिछ्वयाः हःगु खः । होटलया शुल्क थिके जूगु, नेपाःमिपिं तारे होटलय् च्वने चाहेमजूगु आदि तर्क सीसीएमसीया खः ।

बिहिवाः च्वंगु मन्त्रिपरिषद बैठकं उडान हाकनं सुरु यायेगु निर्णय यात । जिल्ला प्रशासन ज्याकुथि येँपाखें वहे कथं होटल क्वारेन्टिनया धलः पिकाल ।

विदेशय् अलपत्र नेपाःमिपिं सरकारं दंक क्वारेन्टिनया व्यवस्था याइगु आशाय् दु । सरकारं धाःसा होटल बुक यानाः जक लिहाँ वयेदइगु कथं निर्णय याःगु दु ।

विदेशं लिहाँ वइपिं नेपाःमिंपिन्त सामुदायिक क्वारेन्टिनय् मतःसे थिकेगु शुल्क पुइकेगु नीति सरकारं काःगु खनेदु । थ्वलिसें सरकारं होटलयात कमेयायेगु लँपु चायेकाः ब्यूगु दु ।

थ्वसिबें न्ह्यः होटल संघ नेपालं पर्यटकीय स्तरया होटलय् च्वने चाहेजूपिनिगु नितिं प्रतिव्यक्ति प्रतिदिन न्यूनतम १८०० तका दां शुल्क क्वःछ्यूगु खः । सरकारं सुन्धारा, बसपार्क व कलंकी क्षेत्रया गेष्ट हाउसया नितिं तकं थ्वहे दर क्वःछ्यूगु दु ।

होटल व्यवसायी महासंघ, नेपालया कार्यवाहक महासचिव शेरबहादुर थापां खानाया मूतकं जोडेयायेबलय् लजतय्गु नं उगु मू  कायम जूगु धाःगु दु । थापां धाःगु दु, न्हिं प्यक्वःतक खानालिसें यायेबलय् थ्व मूयात थिकेजूगु धाये मिलेमजू ।

थापाया कथं, न्यूनतम १५ कोथा दूगु, एम्बुलेन्स दुहाँ वनीगु, पार्किंगया सुविधा दूगु लिसेंया मापदण्डया आधार होटल व लज ल्ययाः सरकारं धलः पिकाःगु धाःगु दु ।

हाथ्या सुरक्षाया

सरकारं क्वःछ्यूगु मापदण्ड पालना मयाःसे होटल संचालन यायेदइमखु । मापदण्ड कथं, होटलय् च्वंपिं मनूत चेकआउट जूगु २४ घौतक उगु कोथाय् मेम्ह मनू तयेमज्यू ।

होटलय् ब्यागलं आइसोलेसन रुमत दयेमाः । कोरोनाया आशंका जूपिं मनूतय्त आइसोलसन रुमय् तयेमाः अर्थात होटलत बच्छि क्षमताय् जक संचालन जुइ ।

होटलयात क्वारेन्टिनया रुपं छ्यलेत स्थानीयबासीलिसे नं समन्वय जुइमाःगु शर्त नं दु । होटलयात उगु शर्त पालना याकेत धाःसा हाथ्याया विषय जूगु दु ।

Categorized in राजनीति