zero media family planning adv

हृदयन्द्र जुजु जुइगु कथं राजसंस्था लिहाँ वइगु...भारतया पूर्व सचिव रमेशया लेखपाखें भविष्यवाणी

नेवा: अनलाइन न्युज – ललेन्द्र शाक्य | २०७७ माघ १२, सोमबार १२:४३:४०

नेपालय् राजसंस्था अपरिहार्य जूगु तर्क तसें भारतया छम्ह पूर्व सचिवं टिप्पणी याःगु दु । भारतया क्याबिनेटया पूर्व सचिव एस. रमेशं लेखपाखें थुज्वःगु तर्क तःगु खः ।

रमेशं १३ जनवरीइ टेलिग्राफ इन्डियाय् पिथंगु लेखपाखें राजसंस्था पुनःस्थापना यायेमाःगुलि बः ब्यूगु दु । नेपाःया राजनीतिइ चीनं अदृष्य भूमिका म्हितूसां तकं नेकपायात फुटपाखें बचेयायेमफूगु वं थःगु लेखय् धाःगु दु ।

चीनयात स्वयेगु वा ओलीया विकल्प मालेगुसिबें नं भारतं न्हूगु विकल्प मालेमाःगु वया धारणा दूगु खः । सत्ता व कुर्सीयालोभय् नेकपा अन्ततः फुट जूगु व ओली समुहयात निरन्तर प्रचण्ड व नेपा समुह नं दबाब सिर्जना यानाच्वंगु धयातःगु दु ।

नेकपाया लिपांगु स्थिति लिपा चीनं नेपाःया घटनाक्रमयात अध्ययन यानाच्वंगु जुइफूगु वया धापू दु । वि.सं. २०६२...०६३ स पूर्व जुजु ज्ञानेन्द्रयात सत्ता त्वःतकेत करण सिंह नेपाः थ्यंकूगु तकं स्मरण यासें वं थःगु लेखय् राजसंस्था पुनःस्थापना यायेत राष्ट्रिय प्रजातन्त्र पार्टीं नेतृत्व कायेमाःगु तकं धयातःगु दु ।

विगतय् बेबी किंगया रुपं न्ह्यःने हःम्ह हृदयन्द्र जुजु जुइत पायछिम्ह पात्र जुइफूगु तकं न्ह्यथनातःगु दु । गिरिजाप्रसाद कोइरालां जुजु ज्ञानेन्द्र व पारसयात हृदयन्द्रया नितिं मार्ग प्रशस्त यायेत आग्रह याःगु खः, एस. रमेशं माओवादीं बेबी किंगया प्रस्ताव अस्वीकार याःगु विषय न्ह्यथंसें धाःगु दु, छु थ्व विगतय् याःगु थ्व आग्रहयात भेट्रान नेतापिन्सं हाकनं थ्व विषययात मान्यता बिइला ? वं हृदयन्द्र १८ दँ थ्यंगु व व भारतया राजखानदानलिसे तकं नातासम्बन्ध दूगु न्ह्यथंगु दु । नेपालय् लिपांगु इलय् राजसंस्थाया पुनःस्थापनाया माग यासें विरोध जुलुसत नं जुयाच्वंगु च्वःगु दु ।

रमेशं विगतय् जुजुयात सौहाद्रपूर्ण तरिकां गद्दी त्वःतकेत कंग्रेस आईया भेट्रान नेता करण सिंहयात भारत सरकारं येँय् छ्वयाहःगु न्ह्यथंगु दु । वं आः हाकनं करण सिंहयात भारत सरकारं छ्वयाहयेफूगु विषय न्ह्यथनातःगु दु । वया आशय राजसंस्था लितहयेत सिंहयात भारतं छ्वयाहइगु विषय जूगु खः ।

नेपालय् लिपांगु इलय् राजतन्त्र पुनःस्थापनाया मागलिसें आन्दोलन खनेदयाः वःगु व थ्व मागयात भारतं पनेमज्यूगु च्वयातःगु दु । नेपाःया विगतया जुजुपिन्सं भारतविरोधी भावनायात बढावा ब्यूगु द्वपं दु, रमेशं लेखय् धयातःगु दु ।

पूर्व जुजु ज्ञानेन्द्र नागरिकया रुपं थःगु जीवन बितेयानाच्वंगु व पूर्व युवराज पारसयात आःतक स्वक्वः हृदयघात जुइधुंकूगु न्ह्यथंसें हृदयन्द्रयात भावी जुजु दयेकेगु विषय न्ह्यथनातःगु दु । पूर्व युवराज पारसयात जनतां जुजु स्वीकार यायेमफइगु वं थःगु लेखय् च्वयातःगु दु ।

नेपालय् सन् १९५० थुखे सुं नं निर्वाचित प्रधानमन्त्रीं न्यादँ कार्यकाल कःघायेमफूगु न्ह्यथंसें प्रधानमन्त्री केपी शर्मा ओलीयात नं उज्वःगु हे अवस्था वःगु रमेशं लेखय् धयातःगु दु । ओली नेतृत्वया नेकपा सरकारं संसद विघटन यनाः संघीयतायात हे धरापय् लाकूगु लेखय् न्ह्यथनातःगु दु ।

थ्व विषयपाखें नेपाःया निगू जलालखा देय् भारत व चीनय् तरंग ब्वलंकूगु न्ह्यथनातःगु दु । वं नेपालय् संवैधानिक राजसंस्थालिसेंया प्रजातन्त्र व २०४७ सालया संविधान पुनःस्थापनाय् पलाः न्ह्याकेमाःगु सुझाब तकं ब्यूगु दु ।

Categorized in पत्रपत्रिका