zero media family planning adv

हानं वइन ज्यापू दिवस

 नेवाः छगू राष्ट्र खः धकाः झीसं धयावयागु दु । नेवाः राष्ट्र धैगु अर्थ थ्व नेवाः दुने नं छगू हे जातिया जक विशेषतां जाःगु राष्ट्र मखु । थुकी नेवाःतय् फुक्कं जात वर्ग समुदाय दुथ्याः । नेवाः राष्ट्र बने जूगु मुख्य आधार थन च्वंपि आदिवासी नेवाःत हे खः । नेवाः राष्ट्र दुने बुँज्यामिनिसें कयाः सिँकःमि, दकःमि, लुँज्याकःमि, नकःमि, बनेज्यामि, राजनीतिज्ञ कर्मचारी, स्यनामि आदि फुक्कं दुथ्याः । अले झीगु थःगु हे भाय् नेपालभाषा दु धाःसा जात अनुसार भचा फरक फरक तजिलजि नं दु । ज्यापु दिवश हनेगु शुरु याःबलय् थुकी उलि तच्वःगु विवादास्पद खँ पिहां मवः । लिपांगु इलय् ज्यापू दिवश ज्याझ्वःयात कयाः नेवाःतय् दुने हे थीथी चर्चा व विवादास्पद खँ त पिहाँ वःगु खनेदत । राष्ट्रिय पर्वया रुपय् सरकारं नापं बिदा बियातःगु ज्यापू दिवशयात कयाः यक्वसिनं यक्व टिप्पणी याना हल ।
नेवाः राष्ट्र दुने जातिय जनसंख्याया ल्याखं नं ज्यापु जाति दकलय् उप्वः जनसंख्या दुगु जाति खः । अले सांस्कृतिकरुपं नं थ्व सुमदाय नेवाःतय् मेमेगु जाति स्वयां तःमिगु जाति खः । अथे खःसां नेवाः जाति दुने न्हापानिसें म्हय्या रुपय् दमित जुयाच्वंगु जाति खः ज्यापु जाति । थौंया परिवर्तित इलय् नं ज्यापू जाति उप्वः धइथें लय्ताच्यः थें जुयाः हे ज्या यानाच्वंगु खनेदु । राजनीतिक व शासकीय ज्ञानया कमि थुगु जाति दुने दु । पञ्चायतकालय् ला राष्ट्रिय पञ्चायतया सदस्यया चुनाव जुइबलय् भोटया राजनीतिइ दकलय उप्वः छ्यलीगु जाति ज्यापु जाति हे खः ।

आः ज्यापुतय् दुने नं आर्थिक व शैक्ष्ँिक स्तर बांलाना वये धुंकुगु दु । पुलां पुस्ता दुने लय्ताच्यः बुद्धि दुसां न्हूगु पुस्ताय् शिक्ष्ाँं मिखा चायेका बी धुंकुगु दु । थुज्याःगु अवस्थाय् थःपिनि अस्तित्व नेवाः राष्ट्र दुने ब्यागलं  दु धैगु छगू छुमाः खः – ज्यापु दिवश ।
ज्यापु दिवश नेवाःतय् नितिं नं बालांगु खँ खः । थुकिं नेवाःतय् दुने विग्रह हइमखु । देय् ला एकात्मक राज्य जुइ मजिल, संघीय राज्य, समानुपातिक प्रतिनिधित्व दुगु जुइमाल धकाः सः थ्वया च्वंबलय् नेवाः राष्ट्र दुने च्वंगु ज्यापु समुदायं यागु ज्यापु दिवशयात नेवाः प्रदेश दुनेया हे छगू समानुपातिक समावेशी दिवशया रुपय् कायेमाः थें च्वं । थुकथं हे थःथःगु जातिय दिवश हनाः वनेगु तर नेवाः राष्ट्रया मामलाय् छगू हे दबुलिइ  नेवाः एकता क्यंनाः नेवाः राष्ट्रयात बल्लाकेगु ज्या याये फइगु स्थिति नं दु । थुकियात नं विचाः यायेमाः । – लयता सिं