zero media family planning adv

हाकनं वायु प्रदूषण अप्वल : वा वइगु सम्भावना म्हो

नेवा: अनलाइन न्युज – ललेन्द्र शाक्य | २०७७ चैत्र २३, सोमबार १५:०६:३१

सोमवाः स्वनिगःलिसें देय् न्यंकं वायु प्रदूषण हाकनं अप्वःगु दु । सोमवाः सुथनिसें निभाः त्वःगु मदुसा स्वनिगःलिसें देसया आपालं थासय् हुस्सु वःथें जुयाः लकस (वातावरण) बुलुसे च्वनाच्वंगु दु । खय्तला आइतवाः सनिलनिसें हे लकस हुस्सुं भुनाच्वंथें च्वंक बुलुसे च्वंगु खः ।

सोमवाःया वायु प्रदूषणय् नं मिखा पालुसे च्वनीगु समस्या खनेदूगु दु । आः सुदूर पश्चिमया कैलाली व मध्य क्षेत्रया चितवनया वायु प्रदूषण अप्वः जूगु दु । धनगढीइ वायु प्रदूषणया मात्रा ४२९ एक्युआई (एयर क्वालिटी इन्डेक्स) तक थ्यंगु दु । अथेहे, चितवनया सौराहाय् ३०८, भरतपुरय् २८३, सिमराय् २६० एक्यूआई थ्यंगु दु ।

अथेहे, स्वनिगःया रत्नपार्कय् वायु प्रदूषणया मात्रा २२३ एक्यूआई, यलया भैंसेपाटीइ २१६, कीर्तिपुरय् १९७, ख्वपय् १९६ यक्यूआई जूगु दु । वायु प्रदूषणया मात्रा ५० एक्यूआई सिबें अप्वः जूसा खतरा कथं काइ ।

वातावरण विभागया प्रवक्ता इन्दुविक्रम जोशीं जंगल मिँ च्याःगु हुनिं धनगढी व सौराहाया वायु दुने आपालं प्रदूषणया मात्रा खनेदूगु धाःगु दु । जोशीया कथं स्वनिगःया सर्गतय् वायुया गुणस्तर सूचकांक म्हो जुजुं वनाच्वंगु दु ।

जोशीं धाःगु दु, स्वनिगःया सर्गतय् वायुया गुणस्तर सूचकांक छसिंकथं म्हो जुजुं वनाच्वंगु दु । तर, कीर्तिपुरय् धाःसा छुं अप्वः क्यंगु दु । व जंगलय् मिँ च्याःगु हुनिं खः ।

न्हापांगु वाः नं स्वनिगःलिसें देसया आपालं थासय् वायु प्रदूषण अप्वःगु खः । तर, हल्का वा वयेधुंकाः मौसमा यच्चुसे च्वंगु खः ।

वा वइगु सम्भावना म्हो

मौसम बदली जूसां नं आः वा वइगु सम्भावना मदूगु मौसम पूर्वानुमान महाशाखां धाःगु दु ।

मौसमविद् समीर श्रेष्ठं धाःगु दु, स्वनिगःलिसें देय् न्यंकं वा वइगु सम्भावना अतिकं म्हो जक दु । तर पश्चिम पहाडी भेग कर्णाली, गण्डकी व लुम्बिनीइ हल्का वा वयेफु ।

Categorized in राष्ट्रिय