zero media family planning adv

हाकनं बन्द चीनलिसेया निगुलिं नाका

नेवा: अनलाइन न्युज – ललेन्द्र शाक्य | २०७७ फाल्गुण २, आइतबार १६:०८:२०

चिनियाँ भन्सा यार्डया श्रमिकपिं ल्होसार छुट्टइि वनेधुंकाः नेपाः व चीनदथुया निगुलिं ब्यापारिक नाका बन्द जूगु दु ।

आः सिन्धुपाल्चोकय् च्वंगु तातोपानी नाका व रसुवाय् च्वंगु रसुवागढी नाका बन्द जूगु दु ।

कोरोनाया हुनिं दच्छि न्ह्यःनिसें पूर्ण संचालनय् वये मफूगु नाकापाखें सीमित रुपं जुयाच्वंगु आयात नं बिहिवाःनिसें बन्द जूगु रसुवागढी भन्सा ज्याकुथि प्रमुख रामप्रसाद रेग्मीं जानकारी ब्यूगु दु ।
भन्सार प्रमुख रेग्मीं धाःगु दु, चिनियाँ ज्याकःमिपिं ल्होसार छुट्टीइ वंगु खm, न्हिथं न्यागः कन्टेनरया दरं जुयाच्वंगु आयात नं आः ठप्प जूगु दु ।

चिनियाँ भन्सार अधिकारीलिसे जूगु खँलबल्हाय् अझ नं थ्यंमथ्यं झिन्हु आयात प्रभावित जुइगु जानकारी वःगु रेग्मीं धाःगु दु । वं धाःगु दु, ल्होसार न्यायेकेत चिनियाँपिं थःगु छेँय् लिहाँवंगु व वयेत झिन्हुया ई तुइगु जानकारी भन्सार अधिकारीपिन्सं ब्यूगु दु ।

कोरोनाया हुनिं बन्द जुयाः चालेत्यंगु रसुवागढी नाका वंगु कार्तिक १३ गतेनिसें एकतर्फी रुपं संचालनय् वःगु खः ।

न्हिथं न्यागः चिनियाँ कन्टेनरं नेपाःपाखे यार्डय् सामान हयाबिइगु कथं नाका चाःगु खः ।

ल्होसारया हे हुनिं तातोपानी नाका नं बन्द जूगु भन्सार ज्याकुथिं जानकारी ब्यूगु दु । ल्होसारया हुनिं चाइनिज व्यवसायी व श्रमिक बिदाय् वंबलय् शुक्रवाःनिसें आयात ठप्प जूगु तातोपानी भन्सार ज्याकुथि प्रमुख लालबहादुर खत्रीं जानकारी ब्यूगु दु ।

भन्सार प्रमुख खत्रीं धाःगु दु, मेगु हुनि छुं नं मदु, ल्होसा विदा खः । शुक्रवाःनिसें सामान वःगु मदु ।

चिनियाँपिं विदां लिहाँ वयेधुंकाः सम्भवतः मंगलवाःनिसें नाका संचालनय् वइगु नं खत्रीं धाःगु दु । आः नाका चालीबलय् न्हिथं २५ कन्टेनर सामान वइगु नं खत्रीं धाःगु दु ।

Categorized in बजाः