prabhu baink new

हाकनं प्रचण्ड व ओली दथुइ कचवं, लिछ्यात सचिवालय बैठक

नेवा: अनलाइन न्युज – ललेन्द्र शाक्य | २०७७ भाद्र १२, शुक्रबार १५:३७:१७

नेपाल कम्युनिष्ट पार्टीया नायःपिं निम्ह पुष्पकमल दाहाल प्रचण्ड व केपी शर्मा ओली दथुइ थौं शुक्रवाः बालुवाटारय् गम्भीर सहलह जूगु दु ।

पार्टी विवाद समाधानया नितिं नीस्वंगु कार्यदलं लःल्हाःगु प्रतिवेदनयात लिपांगु रुप बिइत निम्ह नायःपिं दथुइ सहलह जूगु खःसा उगु सहलह निष्कर्षय् थ्यंके मफुत ।

पार्टीइ जिम्मेवारी बाँडफाँडया विषय व छुं महत्वं जाःगु बुँदाय् केन्द्रीत सहलह निष्कर्षय् थ्यंके मफयेधुंकाः सचिवालय बैठक भाद्र १८ गतेया नितिं लिछ्याःगु दु ।

कन्हय् शनिवाः च्वनीगु बैठकय् कार्यदलया प्रतिवेदनयात निष्कर्षय् थ्यंकाः न्ह्यब्वयेगु तयारी जूगु खः । तर, खँ मिले मजुइधुंकाः सचिवालय बैठक लिछ्याःगु विश्वस्त स्रोतं जानकारी ब्यूगु दु ।

बालुवाटारय् निम्ह नायःपिं दथुइ सहलहपाखें निष्कर्ष पिहाँ मवयेधुंकाः कोरोना भाइरस संक्रमण अप्वःगु धासें स्थगित यानागु जानकारी ब्यूगु दु । यथार्थय् निम्ह नायःपिं दथुइ आःतक नं खँ मिलेजूगु मदुनि । निम्हेस्यां नं कचवं यानाच्वंगु दु ।

नेकपा दुने मन्त्रिमण्डल पुर्नगठन नं सहलहया विषय दु । थुकी नं निम्ह नायःपिं दथुइ खँल्हाबल्हा न्ह्याःगु सीदूगु दु ।

नेकपा दुने प्रधानमन्त्री ओलीया राजीनामा माग यायेधुंकाः विवाद समाधानया नितिं कार्यदल नीस्वंगु खः । कार्यदलप्रति हे सुं सुं नेतापिनिगु असन्तुष्टि दयाच्वंगु दु ।

Categorized in राजनीति