Mohanai 2078 KTM

हाकनं थिके जुल नयेगु चिकं

नेवा: अनलाइन न्युज – ललेन्द्र शाक्य | २०७८ भाद्र ३, बिहिबार १३:११:४३

९ महिनाय् दोब्बर बृद्धि, मौन अनुगमनकारी निकाय

उद्योगतसें नयेगु चिकंया मू हाकनं थकाःगु दु । लिपांगु छवाःया दुने फुक्क कथंया नयेगु चिकंया भाः बृद्धि जूगु नेपाल खुद्रा व्यापार संघं जानकारी ब्यूगु दु ।

लिपांगु शनिवाः थुखे जक नयेगु चिकंया भाः लिटरय् कम्ती नं झितका निसें अप्वलय् स्वीन्यातका दांतक थिके जूगु संघया केन्द्रीय कार्यकारी दुजः ध्रुव अधिकारीं जानकारी ब्यूगु दु ।

अधिकारीं धाःगु दु, ‘तू, सनफ्लावर व मुस्या चिकं फुक्कसिगु मूू छक्वलं थाहाँ वंगु दु, भाः थहाँ वंगुया हुनि उद्योगीपिन्सं धाःगु मदुनि, उद्योगीपिन्सं अझ नं थाहाँ वनेफूगु धाःगु दु ।’

वंगु दँ मंसीरनिसे थ्यंमथ्यं दोब्बर मू थहाँ वंगु नयेगु चिकं भाः छुं ई न्ह्यः क्वाहाँ वःगु धासें उद्योगीपिन्सं प्रचार याःगु खः ।

थ्यंमथ्यं लच्छिया ईतक क्वाहाँ वःगुथें खनेदूगु नयेगु चिकंया भाः हाकनं ह्वात्त हे थहाँ वंगु संघया निवर्तमान नायः पवित्र बज्राचार्यं धाःगु दु । छुं ई क्वाहाँ वःगु प्रचार याःगु नयेगु चिकंया भाः हाकनं पुलांगु हे अवस्थाय् थ्यंकूगु बज्राचार्यया धापू दु ।

बज्राचार्यं धाःगु दु, ‘नयेगु चिकंया भाः प्रतिलिटर २३५ तका तक थ्यंवःगु दु, तर हाकनं २६५ तकाया हे अवस्थाय् थ्यंगु दु । चिकंया भाः अस्वाभाविक व अनियन्त्रित खनेदु ।’

भाः क्वकाःगुथें त्वहः तयाः उद्योगीपिन्सं हाकनं उपभोक्तापिन्त नयेगु चिकंया मूल्यस अन्याय याःगु खुद्रा व्यापार संघया निवर्तमान नायः पवित्र बज्राचार्यं द्वपं ब्यूगु दु । चीधंगु खुद्रा व्यवसायीपिन्त अनुगमन यानाः डामेयाइगु तर उद्योगीपिन्त राजनीतिक संरक्षण दूगुप्रति बज्राचार्यं असन्तुष्टि प्वंकूगु दु ।

साउन २३ गते न्ह्यःतक प्रतिलिटर २२५ तका दां लिटरय् खुद्राय् कारोवार जूगु सूर्यमुखी चिकंया भाः मंगलवाःतक थ्यंबलय् २४० तका थ्यंगु संघं जानकारी ब्यूगु दु ।

अथेहे, धारा तू चिकं व मुस्इा चिकंया मू नं थाहाँ वंगु दु । नयेगु तू चिकंया भाः लिटरय् ३५ तका तक थाहाँ वंगु खुद्रा व्यवसायीपिन्सं धाःगु दु ।

९ महिनाय् दोब्बर बृद्धि

नेपाली बजारय् २०७७ कार्तिकय् मुस्या चिकं प्रतिलिटर १३० निसें १४० तका व सूर्यमुखी चिकं १६० तका प्रतिलिटरय् मिइगु जूगु खः । तर २०७८ असारतक थ्यंबलय् चिकंया भावय् आकाझाकां बृद्धि जूगु खनेदत ।

असार स्ववाःया दुने नेपाली बजारय् मुस्या चिकं प्रतिलिटर २२० निसें २३५ तका तक थ्यंगु नेपाल खुद्रा व्यापार संघया तथ्यांकय् खनेदु ।

अथेहे, १४० तकाया सूर्यमुखी चिकंया मू लिटरय् हे स्वसः तका थ्यंगु दु । तू चिकंया मू नं लिटरय् ५० तकासिबें अप्वः थाहाँ वनाः ३३० तकां मल्याक थ्यंगु दु ।

नेपाल वनस्पति घिउ तेल उत्पादक संघय् २० गू चिकं उत्पादन व प्रशोधन याइगु उद्योगत आबद्ध दु । तर, छुं नं उद्योगीपिं चिकंया भाः थाहाँ वंगु वा क्वाहाँ वःगु बारे सार्वजनि रुपं न्वःवाये चाहेमजू ।

नेपाल वनस्पति घिउ तेल उत्पादक संघया नायः सन्दीप अग्रवालं चिकंया भाः थःपिनिगु हुनिं थाहाँ मवंगु धाःगु दु । वं धाःगु दु, ‘चिकंया भाः क्वाहाँ वइ व थाहाँ वइ, थ्व अन्तर्राष्ट्रिय हुनिं खः थुकी जिमिगु छुं नं ल्हाः मदु ।’

अन्तर्राष्ट्रिय हुनि छु छु खः ? धैगु न्ह्यसलय् धाःसा अग्रवालं थप छुं न्वःवाये चाहेमजू ।

क्यानाडा, युक्रेन, इन्डोनेसिया लिसेंया मुलुकपाखें कच्चा पदार्थ हयाः नेपाली उद्योगीपिन्सं प्रशोधन यासें चिकं मिइगु ज्या यानाच्वंगु दु ।

उगु मुलुकत पाखें भारतय् आयात जुइमदइगु तर साफ्टा सुविधाय् नेपालं भारतय् चिकं निर्यात यायेदइगु जुइधुंकाः थ्व व्यवसाय आः अतिकं बांलानाः वःगु दु । वंगु आर्थिक दँय् जक नेपालं ५३ अर्ब ६५ करोड तका बराबारया मुस्या चिकं भारतय् निर्यात याःगु खः ।

मौन अनुगमनकारी निकाय

दच्छिया ई दुने चिकंया मू बृद्धिबारे छक्वः अनुगमन यानाः निगू उद्योगयात कारवाही यायेधुंकाः थुखे वाणिज्य विभागं थप अनुगमन याःगु मदुनि । नेपाल वनस्पति घिउ तेल उत्पादक संघपाखें चिकंया मूल्यस निरन्तर जूगु मूल्यबारे विवरण माग याःगु विभागया एकोहोरो रटान दु ।

चिकंया मू बारे संघपाखें जानकारी माग याःगु विभागया प्रवक्ता शिवराज सेढाईं धाःगु दु । वं धाःगु दु, ‘मूल्यवृद्धिया गुनासो वःगु दु, जिमिसं उद्योगीलिसे विवरण माग यानागु दु, तर वःगु मदुनि ।’ चिकंया भाः थाहाँ वंगु बारे विभागं उपयुक्त अनुगमन व निर्णय याइगु दाबी सेढाईं नं याःगु दु ।

उपभोक्ताया गुनासो व बजाःया समस्या कथं विभागय अनुगमनया नितिं जनशक्तिया अभाव जूगु सेढाईं नं धाःगु दु ।

 

Categorized in बजाः