swastha 3

हाकनं थाहाँ वन पेट्रोल व एलपी ग्यासया भाः

नेवा: अनलाइन न्युज – ललेन्द्र शाक्य | २०७८ भाद्र ८, मंगलबार १०:४९:०४

नेपाल आयल निगमं पेट्रोलियम पदार्थया मू हाकनं थकाःगु दु । सोमवाः चान्हय् १२ ता ईनिसें लागू जुइगु कथं निगमं डिजेल, पेट्रोल व मचिकंलिसें भुतु ज्याय् छ्यलीगु एलपी ग्यासया मू थकाःगु निगमया प्रवक्ता विनितमणि उपाध्यायं जानकारी ब्यूगु दु । डिजेल, पेट्रोल व मचिकनय् प्रतिलिटर नितका दां थकाःगु खः ।

आः पेट्रोल प्रतिलिटर १३० तका, डिजेल व मचिकं ११३ तका व हवाई इन्धन ८६ तका कायम जूगु निगमया प्रवक्ता उपाध्यायं जानकारी ब्यूगु दु । अथेहे, एलपी ग्यास प्रतिसिलिण्डर २५ तका थाहाँ वयाः १,४५० तका कायम जूगु निगमं जानकारी ब्यूगु दु ।

निगमं हवाई इन्धनय् आन्तरिकपाखेया मू नं प्रतिलिटर नितका दां थकाःगु दु । हवाई इन्धन अन्तर्राष्ट्रिय उडानय् प्रतिकिलोलिटर अमेरिकी डलर १६ डलरं बृद्धि यानाः न्हूगु विक्री मू अमेरिकी डलर ७७० प्रतिकिलोलिटर कायम याःगु दु ।

इण्डियन आयल कर्पोरेशनपाखें वःगु मू धलः कथं निगमं पेट्रोलियम पदार्थया स्वचालित मू समायोजन याःगु धाःगु दु । वंगु असार ३० गते नं निगमं मू समायोजन याःगु खः ।

मू समायोजन लिपा नं निगमयात पेट्रोलय् प्रतिलिटर ८.४२ तका, डिजेलय् प्रतिलिटर २.६४ तका व एलपी ग्यासय् प्रतिसिलिण्डर ४२०.७५ तका घाटा जुइगु निगमं धाःगु दु ।

निगमं धाःगु दु, ‘निषेधाज्ञा ईया विक्री परिमाण कथं हिसाब यायेबलय् १५ न्हुइ थ्यंमथ्यं ९६.०९ करोड तका दां घाटा जुइगु खनेदु । निगमया घाटा निरन्तर जुया तुं च्वनीगु व अमेरिकी डलरया तुलनाय् नेपाली दांया अवमूल्यन जुइगु क्रम मदीगु खःसा निगमं वइगु दिनय् तकं पेट्रोलियम पदार्थया मू समायोजन याना तुं च्वनेमालीगु वाध्यता वयेफूगु खनेदु ।’

Categorized in बजाः