Header Nepal rastra bank Adv

हवाई उडान बन्द याःसा संचालकपिन्त जेलय् तयेगु मन्त्री आलेया ख्याच्वः

नेवा: अनलाइन न्युज – ललेन्द्र शाक्य | २०७९ आषाढ ८, बुधबार ११:४२:४९

उडान मयाइगु वायुसेवा कम्पनीया लाइसेन्स खारेजी यायेगु ख्याच्वः

वायुसेवा कम्पनीया हवाई उडान बन्द यायेगु ख्याच्वः उगु कम्पनीया हे नितिं प्रतिकुल जुइगु जूगु दु । नेपाल नागरिक उड्डयन प्राधिकरणं हवाई उडान क्षेत्र अत्यावश्यक क्षेत्र जूगुलिं छुं नं हालतय् सेवा बन्द यायेमदइगु व यदि बन्द याःसा कारवाही यायेगु ख्याच्वः ब्यूगु दु ।

पर्यटनमन्त्री प्रेम आले स्वयमं नं वायुसेवा कम्पनीतसें सेवा अवरुद्ध याःसा कडासिबें कडा कारवाही यायेगु ख्याच्वः ब्यूगु दु । वं वायुसेवा कम्पनीया संचालकपिन्त जेलय् तयेगु तकंया ख्याच्वः ब्यूगु दु ।

म्हिगः मंगलवाः पत्रकार सम्मेलन यासें वायुसेवा संचालक संघं थौं बुधवाःनिसें फुक्क उडान बन्द यायेगु निर्णय यायेधुंकाः मन्त्री आलें कडा कारवाही यायेगु ख्याच्वः ब्यूगु खः । थुगु विषयस वं प्रधानमन्त्री शेरबहादुर देउवालिसे नं सल्लाह ब्याकेधुंकूगु दु । वं आः सुयागुं धाक व धम्कीपाखें सरकार मग्याइगु धासें सेवा अवरुद्ध याःगु लातधाःसा कडा एक्सनय् क्वाहाँ वयेगु ख्याच्वः ब्यूगु दु ।

प्रधानमन्त्री शेरबहादुर देउवां नं वायुसेवा संचालकं सरकारया निर्णय पालना यायेमाःगु धासें निर्णय कार्यान्वयनय् पंगः थंसां कारवाही यायेत विभागीय मन्त्री आलेयात निर्देशन ब्यूगु दु । प्राधिकरणं धाःसा आः येँय् जक जहाज पार्क मयाःसे येँ पिने नं पार्क यायेत धासें सम्बन्धित जहाजयात थाय् क्वःछिनाब्यूगु दु ।

तर, वायुसेवा संचालकपिन्सं धाःसा प्राधिकरणया निर्णय मानेमयायेगु ख्याच्वः ब्यूगु दु । मन्त्री आलें धाःसा निर्णय मानेमयाःसा विमान कम्पनीया लाइसेनस खारेजनिसें संचालकपिन्त जेलय् तयेगु तकया तयारी जूगु धाःगु दु ।

आः वायुसेवा संचालक संघया नायः क्याप्टेन रामेश्वर थापा प्राधिकरणया निशानाय् लाःगु दु । हवाई उडान बन्द यायेगु अपराध जुइगु धासें प्राधिकरणं थःपिनिगु ऐन व नियम कथं उडान बन्द याइगु वायुसेवा संचालकपिन्त कारवाही यायेत्यंगु खः । थुकिया नितिं प्राधिकरणं संचालकपिन्त गिरफ्तार यानाः माःगु कारवाही यायेगु तकया तयारी याःगु दु ।

हवाइ उडान ठप्प याःसा सुरुइ संघया नायः थापायात गिरफ्तार यायेगु प्राधिकरणया तयारी दु ।

अथेहे, प्राधिकरणं उडान बन्द याइगु वायुसेवा कम्पनीया लाइसेन्स तकं खारेज यायेगु तयारी याःगु दु ।

मन्त्री प्रेमबहादुर आलें नं उडान बन्द याइगु वायुसेवा कम्पनीया वायुसेवा संचालन अनुमति (एओसी) खारेज यायेगु नितिं सम्बन्धित निकाययात निर्देशन बियागु जानकारी ब्यूगु दु ।

Categorized in राजनीति