prabhu baink new

हलिमय् कोरोना संक्रमित ल्याः ३ करोड ९ लख पुल

नेवा: अनलाइन न्युज – ललेन्द्र शाक्य | २०७७ आश्विन ४, आइतबार १३:४६:४५

हलिंन्यंकं कोरोना भाइरस संक्रमितया ल्याः ३ करोड ९ लखं मल्याक्क पुलेधुंकूगु संयुक्त राज्य अमेरिकाया जोन्स हप्किन्स विश्वविद्यालयं जानकारी ब्यूगु दु । कोरोना भाइरस संक्रमितया ल्याः ३ करोड ९ लख ९२ हजार ९८० म्ह थ्यंगु आइतवाः वःगु बुखँय् जानकारी ब्यूगु दु ।

चीनया बुहानय् वंगु दँ न्हापांगुखुसि खनेदूगु कोरोना भाइरसपाखें आःतक सीपिनिगु ल्याः ९ लख ६१ हजार पुलेधुंकूगु नं उगु विश्वविद्यालयं जानकारी ब्यूगु दु । अय्सां हलिमय् कोरोना भाइरस संक्रमित २ करोड २५ लख ८७ हजार ९०५ म्ह मनूत कोरोनामुक्त जुइधुंकूगु दु ।

कोरोना भाइरसपाखें हलिमय् हे दकले अप्वः संक्रमण व सीपिं अमेरिकाय् जूगु दु । आःतक अमेरिकाय् ६९,६७,४०३ म्हसिबें अप्वः मनूत संक्रमित जूगु दुसा २ लख ३ हजार ८२४ म्ह मनूत सीगु उगु विश्वविद्यालयं जानकारी ब्यूगु दु ।

अमेरिका धुंकाः भारतय् आपालं संक्रमित जूपिं दुसा भारत धुंकाः आपालं संक्रमित दूगु देस ब्राजिल खः ।

सीपिनिगु ल्याःया ल्याखं ब्राजिल निगुगु थासय् दुसा भारत स्वंगूगु थासय् दु । भारतय् कोरोना भाइरस संक्रमित ल्याः ५४ लख पुलेधुंकूगु दु ।

ब्राजिलय् १,३६,५६५ म्हेस्यां कोरोना भाइरसपाखें ज्यान गुमेयाःगु दुसा भारतय् आःतक ८६,७२४ म्ह मनूत सीधुंकूगु दु ।

रुस १०,९७,२५१ म्ह संक्रमितलिसें प्यंगूगु थासय् दुसा न्यागूगु थासय् दूगु देय् पेरुइ ७,६२,८६५ म्ह संक्रमित दु ।

विश्व स्वास्थ्य संगठनया कथं कोरोना भाइरसपाखें आःतक दकले अप्वः बांमलाक्क लिच्वः लाकूगु देसया रुपं अमेरिका, भारत व ब्राजिल जूसां नं लिपांगु वालय् युरोपय् अप्वःगु क्रमय् संक्रमण खनेदूगु दु ।

Categorized in अन्तर्राष्ट्रिय