नेवा: अनलाइन न्युज – ललेन्द्र शाक्य | २०७७ फाल्गुण ९, आइतबार १६:५५:४८

थौं फेब्रुअरी २१ तारिखया दिं हलिं मांभाय् न्हिया लसताय् येँया जनबहालय् तःजिक नेपालभाषा साहित्य व म्ये ब्वज्या ज्याझ्वः जूगु दु ।

येँया केलत्वाःया नेपाःमिपिं पाखें ग्वसाः ग्वःगु उगु नेपालभाषा साहित्य व म्ये ब्वज्या ज्याझ्वलय् बरिष्ठ साहित्यकःमि, संगीतकःमिलिसें नांजाःपिं साहित्यकार व संगीतकःमि नापनापं न्हूप्रतिभा संगीतकःमिपिन्सं थःथःगु साहित्य व संगीत न्ह्यब्वःगु खः ।

जनकवि दुर्गालाल श्रेष्ठं थौंकन्हय् म्हं मफया भेन्टिलेटरय् च्वनाः वासः याकाच्वंम्ह नांजाःम्ह विद्वान, समालोचक लिसें नेवाः न्ह्यलुवाः माणिकलाल श्रेष्ठयात कयाः चिनाखँ न्ह्यब्वयादीगु खः ।

ज्याझ्वलय् सुमन मानन्धर, प्रतिमा बज्राचार्य, रामकृष्ण खड्गी, लजना मानन्धरलिसेलिसें थीथी म्येहालामिपिन्सं थःथःगु सांगितिक ब्वज्या न्ह्यब्वःगु खःसा न्हूप्रतिभा म्येहालामि कथं पिलू वयाच्वंम्ह किपूया मचाम्ये हालामि एरोन महर्जनं नं थःगु सांगितिक ब्वज्या न्ह्यब्वःगु खः ।