ad prabhu

हलिंन्यंकं न्हिथं ६ लखसिबें अप्वः कोरोना संक्रमित थप

नेवा: अनलाइन न्युज – ललेन्द्र शाक्य | २०७७ मङ्सिर ५, शुक्रबार १२:१७:२१

वंगु २४ घौ दुने हलिंन्यंकं थ्यंमथ्यं ७ लख कोरोना भाइरसया संक्रमित ल्याः बृद्धि जूगु दु । लिपांगु तथ्यांक कथं हलिंन्यंकं ५ करोड ७२ लख ३९ हजारम्हेसित कोरोना संक्रमित जुइधुंकूगु दु ।

बिहिवाः कोरोना भाइरसया संक्रमित ल्याः ५ करोड ६५ लख थ्यंगु खः । वंगु २४ घौ दुने ११ हजारया संक्रमणपाखें ज्यान वंगु दु । लिपांगु तथ्यांक कथं १३ लख ६५ हजार ६ सय ९५ म्हेसिगु ज्यान वनेधुंकूगु दु । हलिंन्यंकं ३ करोड ९७ लख कोरोना भाइरसया संक्रमणपाखें मुक्त जूगु दु । १ करोड ६१ लख सक्रिय संक्रमित दु ।

अमेरिकाय् छन्हु हे २ लखसिबें अप्वः संक्रमित ल्याः थप जूगु दु । हलिमय् दकले अप्वः अमेरिकाय् १ करोड २० लख ७० हजारम्ह कोरोना संक्रमित जुइधुंकूगु दु । गुगुमध्य् २ लख ५८ हजारम्ह मनूत सीधुंकूगु दु ।

भारतय् ९० लख संक्रमितमध्ये १ लख ३२ हजारम्ह मनूत सीधुंकूगु दु । ब्राजिलय् ५९ लख ८३ हजार संक्रमितमध्ये १ लख ६८ हजारम्ह मनूत सीधुंकूगु दु ।

युरोपया देसतसें संक्रमित व सीपिनिगु ल्याखय् मेमेगु देसतय्त धमाधम ल्यूने लाकाः हयाच्वंगु दु । फ्रान्सय् २० लख ८६ हजार संक्रमित ल्याःमध्ये ४७ हजारम्ह मनूत सीधुंकूगु दु । अन लकडाउन जुयाच्वंगु दु ।

रुसय् २० लख संक्रमितमध्ये ३४ हजारम्ह मनूत सीधुंकूगु दु । स्पेनय् १५ लख ७४ हजार संक्रमितमध्ये ४२ हजारम्ह मनूत सीधुंकूगु दु । बेलायतय् १४ लख कोरोना संक्रमितमध्ये ५३ हजार सीधुंकूगु दु । इटलीइ १३ लख संक्रमितमध्ये ४७ हजार सीधुंकूगु दु ।

लिपांगु तथ्यांक कथं नेपालय् २ लख १५ हजार २० म्ह कोरोना संक्रमितमध्ये १२ सय ७६ म्ह सीधुंकूगु दु ।

Categorized in अन्तर्राष्ट्रिय