nepal investment baink

हलिंन्यंकं च्वंपिं नेवाःतय्गु मंकाः दिं तःजिक हन

नेवा: अनलाइन न्युज – विजयरत्न | ने.सं. ११४४ चिल्लागा खस्थि (२०८० चैत्र १८ गते) आइतवाः

हलिंन्यंकं च्वंपिं नेवाःतय्गु मंकाः दिं कथं दँय् दसं न्यायेकाः वयाच्वंगु हलिं नेवाः दिं शनिवाः यलया केशवनारायण चुकय् याःगु दु ।

ख्यालिजुजु मदनकृष्ण श्रेष्ठया मूपाहाँसुइ जूगु उगु न्हयक्वःगु हलिं नेवाः दिं ज्याझ्वलय् वरिष्ठ भाषासेवी बाखँ च्वमि राजा शाक्य, प्रा.सुवर्ण शाक्य, वरिष्ठ कलाकार किरण मानन्धर, विश्व च्याम्पियन भारोत्तोलन कासामि महेश्वर महर्जन, मा. ध्रुव बहादुर प्रधान, डा. पुकार चन्द श्रेष्ठ (वरिष्ठ नेफ्रोलोजिष्ट), उद्योगी सुसन कर्माचार्य, पर्यटन व्यवसायी अजय स्थापित, वरिष्ठ इतिहासविद् योगेन्द्रमान श्रेष्ठ, वरिष्ठ निर्देशक व कलाकार पवन जोशी, वरिष्ठ पत्रकार सुरेश किरण मानन्धर, समाजसेवी यूरीकाजी कसाःयात हंगु दु । थुकथं  हे संस्थागत रुपं नेपाः पासा पुचः अमेरिकाय् (मेरिल्याण्ड) व झी पुचः (विराटनगर)यात नं हनेगु ज्या जूगु खः ।

संगीतख्यःया सिरपाः कथं स्वनातःगु  मदुम्ह रमेश ताम्राकार लुमन्ति सिरपाः म्येहालामि निशा देसारयात लःल्हागु उगु ज्याझ्वलय् नेवाः देय दबूया नायः पवित्र बज्राचार्य, प्रदेश सांसद हरिप्रभा खडगी श्रेष्ठ लगायत पाहाँपिं उपस्थित जुयादीगु खः ।

हलिं नेवाः दबूया नेपाः च्याप्टरया नायः सुरेन्द्रभक्त श्रेष्ठया नापनापं केन्द्रिय न्वकू शाक्य सुरेनं नुगःखँ तयादिलसा वहे ज्याझ्वलय् लोककवि राजभाई जकःमिं च्वयादीगु नेवाः स्मारिका व हलिं नेवाः म्ये नं  सार्वजनिक याःगु खः ।

अथेहेतुं सन्चार दूत कथं विराजकाजी राजोपाध्याय, युवा दूत कथं नितिक डंगोल व सांस्कृतिक दूत कथं मदनकृष्ण श्रेष्ठ व भिन्तुना जोशीयात नं दसिपौ देछाःगु खः ।

Categorized in नेवाः