नेवा: अनलाइन न्युज – ललेन्द्र शाक्य | २०७९ चैत्र २, बिहिबार १२:२७:५७

बज्राचार्य समुदायया तःधंगु धार्मिक पर्व म्हिगः बुधवाः व थौं बिहिवाः निन्हुयंकं तःजिक हनाच्वंगु दु ।

म्हिगः बुधवाः स्वयम्भू महाचैत्य देय् आचार्य गुथि न्यायेकूगु खः । येँ देय्या थ्यंमथ्यं स्वद्वःम्ह बरेछुइ धुंकूपिं बज्राचार्यपिन्त दानदक्षिणा बिसें थुगु दँय् शैक्षिक क्षेत्रलिसें थीथी क्षेत्रया थःथःगु कथं ज्याय् ताःलाःपिन्त सम्मान ज्याझ्वः नं याःगु खः ।

देय् आचार्य गुथिं म्हिगः बुधवाः बागमती प्रदेशया सांसदपिं निरोज बज्राचार्य व शैलेन्द्रमान बज्राचार्यपिन्त हनेज्या याःगु खः ।

देय् आचार्य गुथिया निन्हुया दिं थौं बिहिवाः येँया हनुमानध्वाखाया नासःचुकय् बज्राचार्यपिन्त दान यायेगु ज्याझ्वः तयातःगु खः ।

थुगु दँय् स्वयम्भू पाःलाः प्रकाश बज्राचार्य क्वाःबहाः व तःछेबहाःया चक्रेश्वर शंकरानन्द बज्राचार्य जुयादीगु दु । अथेहे, छेँ पाःलाः सिकःमू बहाःया आनन्द बज्राचार्य व लगंबहाःया सन्तमान बज्राचार्य जुयादीगु दु ।

किपाः सरोज बज्राचार्य

Categorized in स्थानिय-समाज