newayatataad 2

हत्याया विरोध : बर्दिबासय् निषेधाज्ञा तोडेयासें प्रदर्शन

नेवा: अनलाइन न्युज – ललेन्द्र शाक्य | २०७७ मङ्सिर १०, बुधबार १२:१९:५८

खुदँ दुम्ह मिसामचा बलात्कार व हत्याया विरोधय् थौं बुधवाः नं बर्दिवासय् प्रदर्शन जुयाच्वंगु दु । स्थानीय प्रशासनं निषेधाज्ञा जारी याःसां नं प्रदर्शनकारीपिन्सं तोडेयासें प्रदर्शन यानाच्वंगु दु ।

प्रदर्शनकारीपिन्त प्रहरीं गोली चलेयाःबलय् मंगलवा: बुद्धिराज न्यौपानेया ज्यान वंगु खःसा अथे ज्यान वनेधुंकाः स्थिति झन् स्यंगु खः । न्यौपानेयात हेलिकोप्टरपाखें वासः यायेगु नितिं येँया ग्रान्डी अस्पतालय् हःसां नं बचेयाये मफुगु खः । न्योपानेया ज्यान वनेधुंकाः बर्दिवासय् आक्रोश अप्वयाः वयाच्वंगु दु ।

बर्दिवासय् हिंसात्मक घटना जुइके मबियत धासें स्थानीय प्रशासनं निषेधाज्ञा जारी याःगु खः । प्रमुख जिल्ला कृष्णबहादुर कुटरवालं पूर्वय् रातुखोला, पश्चिमय् बर्दिवास माइस्थान, उत्तरय् बर्दिवास ३ पाटु व दक्षिणय् रामानन्द चोक प्यंगू किल्ला यानाः निषेधाज्ञा जारी यानागु जानकारी ब्यूगु दु । तर, स्थानीय बासिन्दां निषेधाज्ञा तोडेयायेधुंकाः थप सुरक्षाकःमि अप्वयेकूगु दु ।

खुदँ दुम्ह गुलाबसा खातुनया बलात्कार लिपा हत्या यायेधुंकाः बर्दिवासय् विरोध प्रदर्शन जूगु खः । घटनाया अभियुक्तयात गिरफ्तार यानाः कारवाही न्ह्यःने यंकेधुंकूगु दु ।

Categorized in दुर्घटना-अपराध