newayatataad 2

हत्याया द्वपं लाःम्ह वडाध्यक्ष धरौटीं पिहाँ वल, अबिर जात्रा

नेवा: अनलाइन न्युज – ललेन्द्र शाक्य | २०७७ मङ्सिर १२, शुक्रबार १२:१६:५०

हत्या याःगु द्वपं लाःम्ह विराटनगर महानगरपालिका १४ वडाया वडाध्यक्ष बलदेव यादव धरौटीं पिहाँ वःगु दु । विराटनगर १४ या हे ५५ दँया समानन्द यादवया हत्या याःगु द्वपं फयाच्वंम्ह यादव जिल्ला अदालत मोरंगय् हाजिर जूगु हे दिं धरौटी पुलाः पिहाँ वःगु खः ।

हत्याया द्वपं फयाच्वंम्ह यादव किटानी जाहेरी लायेधुंकाः दत्या न्ह्यःनिसें फरार जुयाच्वंगु खः । म्हिगः बिहिवाः जिल्ला अदालत मोरंग हाजिर जूम्ह यादवयात जिल्ला न्यायाधीश तेजबहादुर खड्काया इजलासं ३ लख धरौटीइ त्वःतेत आदेश ब्यूगु खः ।

आदेशलिपा यादव धरौटी पुलाः पिहाँ वःगु जिल्ला अदालत मोरंगया श्रेस्तेदार राजकुमार दाहालं जानकारी ब्यूगु दु । यादव हाजिर जूगु हे दिं पिहाा वःबलय् वया समर्थकपिन्सं अबिर जात्रा याःगु खः ।

यादवया हे छेँय् च्वंगु खः पंचायती

ब्याहाया विषयस विवाद जूबलय् २०७६ जेठ ३२ गते विराटनगर महानगरपालिका १४ या वडाध्यक्ष बलदेवव यादवया छेँय् च्वंगु पंचायतीइ जलाखला ५५ दँया समानन्दयात कुटपिट जूगु खः ।

कुटपिटपाखें घाःपाः जूम्ह समानन्द यादवया लच्छि लिपा २०७६ असार २६ गते मृत्यु जूगु खः । समानन्दं तःधिकःम्ह काय्या ब्याहा याकाबिइगु वचं ब्यूगु खः । तर, काय् नं ब्याहा यायेत आनाकानी यानाः मानेमजुइ धुंकाः वडाध्यक्ष बलदेवया छेँय् समानन्दयात कुटपिट याःगु खः । कुटपिटय् वडाध्यक्ष बलदेवलिसें मेपिं निम्ह वडाध्यक्षपिनिगु सहभागिता दूगु पीडित छेँजःपिन्सं द्वपं ब्यूगु दु ।

समानन्द यादवया ज्यान वनेधुंकाः छेँजःपिन्सं घटनाय् दुथ्याःपिं व द्वपं लाःपिं स्वम्ह वडाध्यक्षलिसें झिम्ह विरुद्ध किटानी जाहेरी ब्यूगु खः । जाहेरी लाःपिं स्वम्ह वडाध्यक्षमध्ये निम्हेसित जिल्ला अदालत मोरंगं पूर्पक्षया नितिं कारागार चलानया आदेश ब्यूगु खः । घरधनी तकं जूम्ह विराटनगर १४ या वडाध्यक्ष बलदेव यादवयात पूर्पक्षया नितिं धरौटीइ त्वःतेगु आदेश ब्यूगु खः ।

वंगु जेठ १४ गते अदालतय् उपस्थित जूम्ह विराटनगर १८ या वडाध्यक्ष संजय साह व २४ माघय् हाजिर जूम्ह जहदा गाउँपालिका १ या वडाध्यक्ष प्रदीपचन्द्र यादवयात थुनाय् तयेगु आदेश ब्यूगु खः ।

उच्च अदालत विराटनगरं प्रदीपचन्द्र यादवयात जिल्लाया आदेश बदर यासें धरौटीइ त्वःतेत आदेश ब्यूगु खः । साहया हकय् धाःसा जिल्लाया आदेश सदर याःगु खः ।

Categorized in दुर्घटना-अपराध