ad prabhu

स्वास्थ्य मन्त्रालय दुने पत्रकारपिन्त दुहाँ वनेगुलि बन्देज !

नेवा: अनलाइन न्युज – ललेन्द्र शाक्य | २०७७ बैशाख ३१, बुधबार १७:३८:०८

स्वास्थ्य व जनसंख्या मन्त्रालयं थौं बुधवाःनिसें पत्रकारपिन्त मन्त्रालय दुने दुहाँ वयेगुलि बन्देज तःगु दु ।

थ्वसिबें न्ह्यः न्हिथंथें समाचार संकलनया नितिं परिचय पत्र क्यनाः दुहाँ वयेगु यानाच्वंपिं पत्रकारपिन्त थौं बुधवाःनिसें धाःसा सुरक्षाकःमिपिन्सं गेटं हे दुमकाःगु खः । इमिसं ‘च्वय् फोन या, सःतूसा जक वनेदइ’ धकाः धासें पत्रकारपिन्त दुहाँ वनेगुलि बन्देज तःगु खः ।

स्रोतया कथं बुधवाः स्वास्थ्य मन्त्रालयस च्वंगु बैठकय् बरिष्ठ अधिकारीपिन्सं पत्रकारपिन्त नापमलायेत व सुचं मबिइत कर्मचारीपिन्त निर्देशन हे ब्यूगु खः ।

आः पत्रकारपिन्सं स्वास्थ्य मन्त्रालयस दुहाँ वनेगु नितिं मन्त्रालयया विज्ञ सल्लाहकार डा. खेम कार्की व प्रवक्ता डा. विकास देवकोटायात सम्पर्क यायेमालीगु जूगु दु । इमित थःगु ज्या व नापलाये माःम्ह व्यक्तिया जानकारी बिइधुंकाः जक व नापलायेमाःम्ह व्यक्तिया फूर्सद दुसा जक पत्रकारपिं दुहाँ वनेखनीगु जूगु दु ।

मन्त्रालयस मेपिं मनूतय्गु वयेवनेगुलि रोक्का मजूसां नं पत्रकारपिन्त धाःसा गेटं हे दुमछ्वःगु खः ।

मन्त्रालयया प्रशासन प्रमुख रघुराम विष्टं कोरोना संक्रमण अप्वयाः वंगुलिं नापलायेगु ज्याय् कडाई यायेमाःगु प्रतिक्रिया ब्यूगु दु ।

लिपांगु इलय् मन्त्रालयया प्रवक्तां न्हिं छक्वः याइगु नियमित अपडेटबाहेक मेमेगु माध्यमपाखें स्वास्थ्य मन्त्रालयया सुचं बिइत कडाई याःगु दु । तर मन्त्रालयपाखें अझ नं सुचं पिहाँ वंगु धासें पत्ररकारपिन्त प्रवेश हे निषेध याःगु खः ।

Categorized in राजनीति