prabhu baink new

स्वास्थ्यकःमिपिन्त डेराय् वनेत पन धाःसा ११४९ स फोन यानादिसँ ...गृहमन्त्रालय

नेवा: अनलाइन न्युज – ललेन्द्र शाक्य | २०७७ भाद्र १३, शनिबार १४:३६:२८

नोवेल कोरोना भाइरस कोभिड १९ या वासः यायेगुलि खटेजुयाच्वंपिं स्वास्थ्यकःमि, सुरक्षाकःमि वा राष्ट्रसेवक कर्मचारीपिन्त डेरा वा छेँय् वयेवनयेगुलि पंगः थनीपिन्त गृहमन्त्रालयं कारवाही याइगु जूगु दु ।

महामारी नियन्त्रणय् खटेजुयाच्वंपिन्त हुलहुज्जत यायेगु, धम्की बिइगु, बसोबास यानाच्वंगु छेँ वा डेराय् वयेवने मबियकेगु, घेराऊ याइपिं वा दुर्व्यवहार याइपिन्त कडा कारवाही यायेत सम्बन्धित निकाययात निर्देशन ब्यूगु गृहमन्त्रालयया प्रवक्ता चक्रबहादुर बुढां जानकारी ब्यूगु दु ।

प्रवक्ता बुढां धाःगु दु, यदि सुनां नं गृहमन्त्रालयं सार्वजनिक याःगु छुं नं हर्कत याःसा मन्त्रालयया टोल फ्रि नम्बर ११४९ वा नेपाल प्रहरीया १०० नम्बरय् फोन यानादिसँ, उजुरीकर्ताया विवरण गोप्य जुइ ।

स्थानीयबासीया नामय् उश्रृंखल गुण्डातसें येँ, मोरंग व चितवनय् कोभिड १९ या नियन्त्रणय् खटेजुयाच्वंपिन्त दुर्व्यवहार यायेधुंकाः थुज्वःगु निर्देशन बिइमाःगु मन्त्रालयं जानकारी ब्यूगु दु ।

ल्वगिया वासः यायेगुलि खटेजुयाच्वंपिं वा महामारी नियन्त्रणय् पलाः न्ह्याकाच्वंपिं न्ह्याम्हेसित नं सम्मान व उत्प्रेरित यायेमाःगुलि सुं मनूतसें अःखतं धम्की बिइगु, छेँ घेराऊ यायेगु इत्यादी हर्कत यानाच्वंगु मन्त्रालयपाखें सार्वजनिक याःगु विज्ञप्तिइ न्ह्यथनातःगु दु ।

Categorized in राजनीति