नेवा: अनलाइन न्युज | २०८० भाद्र १२, मंगलबार १३:५४:३६

सन् २०१६ स जूगु बम विस्फोटया घटनाय् दुथ्याःगु द्वपनय् इराकं स्वम्हेसित मृत्युदण्ड सजाय ब्यूगु दु ।

बगदादय् जूगु उगु विस्फोटय् स्वसःम्हसिबें अप्वः मनूत सीगु खः ।

उगु घटना सन् २००३ स अमेरिकी नेतृत्वया आक्रमणलिपा इराकय् जूगु दकले घातक विस्फोट खः । इस्लामिक स्टेट (आईएसं) उगु घटनाया जिम्मेवारी काःगु खः ।

प्रधानमन्त्री मोहम्मद शिलाअल–सुडानीया ज्याकुथिं मृत्युदण्ड ब्यूपिनिगु नां धाःसा सार्वजनिक याःगु मदु । इमित आइतवाः व सोमवाः मृत्युदण्ड ब्यूगु जानकारी वःगु दु ।

थुखे समाचार एजेनसी एएफपीं धाःसा मृत्युदण्ड ब्यूपिंमध्येया घटनाया मू योजनाकार कथं कयातःम्ह घाजवान अल–जवबी नं दूगु खः । इमित सन् २०२१ स ज्वनाः इराक हःगु खः ।

सन् २०१६ या जुलाई ३ स इराकया राजधानीइ शिया मुस्ल्मि बाहुल्य दूगु काराडाय् च्वंगु व्यापारिक भवन लिक्क छगः गाडीइ बम तयाः विस्फोट याःगु खः ।

Categorized in अन्तर्राष्ट्रिय