dudha jayanti 2568

स्वलात्या लिपा जक पसः चायेकेफत

“बैशाख १२ गते तःभुखाय् लिपा थौं स्वलात्या लिपा जक पसः चायेकेफत । तःभुखाचं बैशाख १२ गते पसः च्वय् दुन, थ्वयां लिपा पसः बन्द हे जुल, छु यायेगु, गथे यानाः दयेकेगु धइगु बिचाः यायां हे हानं बैशाख २९ गते तःभुखाय् ब्वल, झं अप्वः च्वय् दुने कुहाँवल । बल्लतल्ल उखेथुखे यायं च्वय् अंगः दयेकाः जस्तातयाः बल्ल पसः चायेकेफुगु स्थिति वल ।”

असंत्वाःया पुलांगु काजु पसःकथं नांजाःगु पसःया साहु संजिव बज्राचार्यं स्वला त्या लिपा पसः चायेकेगु ज्या जूगु थुकथं कनादिल । 

वय्कलं धयादी, ‘थ्व पसः जिमि बाज्ल्याया पालंनिसें खः, बाज्या मदयेधुंकाः, बाः व तःबाः च्वन । आः जि च्वना । थुकथं स्वयेगु खःसा करि करिब निसःदँ दयेधुंकल जुइ पसः चायेकाःगु । थ्व निसः दँय् थुलि ताःहाकः पसः बन्द जूगु थ्व न्हापांखुसी जुइमाः ।”

गुथि संस्थान अन्तर्गत लाःगु थुगु पसः दुगु छेँ तःभुखाय्लिपा असनय् जुयाच्वनीपिं मनूतय्त तकं खतराय् लाकाच्वंगु खः । 

भाजु बज्राचार्यं धयादीकथं गुथि संस्थानया जूगुलिं मर्मत यायेमाल धकाः गुथि संस्थानय् वना, वडाय् वना, प्रहरीइ वना तर सुनां नं मर्मत यायेगु खँ मल्हाः । वय्कलं धयादी – “खँ जिगु पसः बन्द जूगुलिं जक मखु, लँय् जुइपिं दुर्घटनाय् लाइ धकाः सना जुयागु खः, तर कन्हय् कन्हय् धाधां स्वलातक नं छुं मयात, अन्तय् जिं हे गुथि संस्थानय् निवेदन दर्ता याना । वडाय् नं निवेदन दर्ता याना । प्रहरीइ नं निवेदन दर्ता याना । मानवीय क्षति जुइफु, मर्मत यानाबी माल धकाः । तर सुुनां नं च्यूता मक्यसेंलि अन्ततः थःगु ध्यबा खर्च यानाः जस्तापाता फेरे याना, अंगः दना, थ्व खर्च निगू लखति वल ।”

असं जनबमाः जुयाः वयेबलय् जवय्सं दुगु थुगु पसः पुलांगु काजु पसः जक मखु शंखपसः नं खः । उगु इलय् ताःपाक तापाकं मनूत वयाः शंख न्यायेत वइगु खःसा शंख न्याइपिसं ‘शंख पुयाः बांलाः बांमलाः धकाः स्वइगु जूगुलिं असं त्वाः छगुलिं ताये दयेक शंखया सः नं उगु पसःया म्हसीका बियावयाच्वंगु दु ।