nepal investment baink

स्वन्ति नखःया प्यन्हुया दुने १ अर्ब ३२ करोड लुँ मिल

नेवा: अनलाइन न्युज – ललेन्द्र शाक्य | २०८० मङ्सिर ४, सोमबार ११:४५:३३

स्वन्ति नखःया प्यन्हुया दुने १ अर्ब ३२ करोड तका बराबरया लुँया कारोवार जूगु व्यवसायीपिन्सं धाःगु दु ।

मंसीरया ब्याहाया लगन व धन्तेरस पर्वय् लुँया कारोवारय् आपालं सुधार जूगु नेपाल सुनचाँदी व्यवसायी महासंघं जानकारी ब्यूगु दु ।

महासंघया नायः मणिकरत्न शाक्यं स्वन्ति नखःया प्यन्हुया दुने १३५ किलो लुँ मिइगु ज्या जूगु धाःगु दु । गुकिया बजार मू १ अर्ब ३२ करोड ७९ लख ९५ हजार तका बराबर जुइ ।

महासंघया नायः शाक्यया कथं स्वन्ति नखःया प्यन्हुया दुने औसत ३५ किलोया दरं छापावाल लुँया मिइगु ज्या जूगु खः । अथेहे धन्तेरसया दिं धाःसा छन्हुं हे ५० किलोलुँ मिइगु ज्या जूगु महासंघया नायः शाक्यं धाःगु दु ।

नायः शाक्यं धाःगु दु, ‘जिमिसं देय् न्यंकंया तथ्यांक कयागु दु । स्वन्ति नखः ज्वःछिया प्यन्हुया दुने मुक्कं १३५ किलो लुँ म्यूगु दु धैगु दु । गुकिया मू १ अर्ब ३२ करोड ७९ लख तका बराबर जुइ ।’

धन्तेरस पर्वया दिं लुँ म्यूगु मू १ लख १४ हजार ७ सय तका खः । बजारय् थ्वसिबें न्ह्यः मिइगु ज्या मजुयाः बैंकय् दूगु लुँ स्वन्ति नखतय् खपत जूगु महासंघं जानकारी ब्यूगु दु । सरकारं आः न्हिथं २० किलो लुँ आयात यायेत अनुमति ब्यूगु दु ।

मंसीरय् छु जुइ मू ?

ब्याहाया लगनया महिना मंसीर सुरु जुइधुंकाः बजारय् लुँ वहःया कारोवारबारे उपभोक्ताया च्यूताः अप्वःगु दु ।

स्वन्ति व कार्तिक महिना क्वचायेधुंकाः लुँया मू तोलाय् निद्वः व स्वसः तका थाहाँ वंगु दु ।

गुकिया हुनिं मंसीरय् लुँया मूयात कयाः उपभोक्तापिन्त चिन्ता अप्वःगु दु । थुखे लुँ वहः व्यवसायी महासंघं नं लुँया मू श्रृंखला स्वयेबलय् मंसीरय् लुँ थप थिके जुइफूगु आंकलन याःगु दु ।

रुस–युक्रेन व इजरायल–प्यालेस्टाइन युद्धया हुनिं विश्व अर्थतन्त्रय् लिच्वः लाःगु व उकिया लिच्वः लुँया बजारय् लाइगु खनेदूगु महासंघया नायः शाक्यं धाःगु दु ।

मेखे चीन–अमेरिका व्यापारिक टसल व ब्रिक्स राष्ट्रपिनिगु न्हूगु मुद्रा प्रचलनय्हयेगु बहसं आः विश्व अर्थतन्त्र ‘प्यू व स्व’या अवस्थाय् दूगु शाक्यं धाःगु दु ।

महासंघया नायः शाक्यं धाःगु दु, ‘डलरया विरुद्धय् ब्रिक्सं न्हूगु मुद्रा प्रचलनय् हल धाःसा लुँया मूनं थप उचाइ काइगु खनेदु । थ्व ई दक्षिण एसियाय् लुँया आपालं खपत नं जुइगु जूगुलिं मू थाहाँ वनेगु हे खनेदु ।’

Categorized in बजाः