zero media family planning adv

स्वन्तिया निन्हुया दिंः थौं खिचापूजा

–डा. चुन्दा बज्राचार्य

कार्तिक शुक्ल चतुर्दशीकुन्हु यमपञ्चकया निगूगु निन्हुया दिं खः । थ्व दिंकुन्हु थःपिन्त रक्षा याइम्ह, भैरवया बहान वा यमराजया दूत धकाः धयातःम्ह खिचायात पूजा यानाः हनीगु खः ।

खिचापूजाकुन्हुयात नरक चतुर्दशी धकाः नं धायेगु याः । छेँय् लहिना तःपिं खिचा दुसा लहिनातःम्ह खिचा वा लहिनातःपिं खिचात मन्त धाःसा लाछिइ च्वनीपिं खिचायात थःगु पिखालखुइ सःताः सिन्हः तिकाः स्वांमाः क्वखायेकाः पूजा यानाः विशेष नसा ला नापनापं मरिचरी तयाः नकेगु याइ । थ्वकुन्हु छेँय् जा थुयाः दकले न्हापां खिचायात निं तयाः नकेगु चलन दु ।

खिचा गुण स्यूम्ह प्राणीया रुपय् नं कायेगु याः । अथेतुं खिचायात सुचं वाहकया रुपय् नं कायेगु याः । भुखाय् ब्वइगु जुल धाःसा न्हापां खिचातसें उइगु याइ । अथेतुं त्वालय् चान्हय् सुनसान इलय् खुँ वल धाःसा दकले न्हापां उयाः त्वाःयापिन्त सतर्क यानाबी ।

अथेतुं चथाः बलय् चथाःद्यः लुल धकाः खिचां हे उयाः संकेत यानाबी । खिचां ऊगुया भरय् चथाःद्यः लुल धकाः चथाःद्यःयात पूजा यायेगु याइ ।

थुकथं थीथी समाजयात सचेत याइगु जूगुलिं खिचायात पूजा यायेगु यानावःगु खः । अथे जूगुलिं हे नेवाःतसें सराद याइबलय् थः पूर्खापिन्त जक पिण्ड तयेगु मजुसे खिचा व क्वःयात नं पिण्ड तयाः थुमित थःगु हे परिवारया जः कथं कयाः वयाच्वंगु खः ।