coved ad

स्वनिगलय् स्मार्ट लकडाउन सुरु जुइधुंकल : यलया प्रजिअ

नेवा: अनलाइन न्युज – ललेन्द्र शाक्य | २०७८ पौष २८, बुधबार १३:३१:४१

यलया प्रमुख जिल्ला अधिकारी घनश्याम उपाध्यायं स्वनिगःया स्वंगुलिं जिल्लाय् मंगलवाःनिसें स्मार्ट लकडाउन सुरु जूगु धाःगु दु ।

यलया प्रमुख जिल्ला अधिकारी उपाध्यायं धाःगु दु, ‘मुलुक कोरोनाया स्वंगूगु लहर लिक्क थ्यंगु महसुस यानाः कोभिड १९ संकट समन्वय केन्द्र (सीसीएमसी)या सिफारिस व गृहमन्त्रालयया निर्णय कथं स्वंगुलिं जिल्ला प्रशासनं १७ बुँदे आदेश जारी याःगु दु । उकी जनस्वास्थ्य मापदण्डया कडाईया लिसें पालना, खोप अभियान अप्वयेकेगु, अक्सिजनया सहज आपूर्ति, अस्पताल, आइसोलेसन सेन्टर, उपचारया पूर्वतयारी इत्यादी खँ कःघाःगु दु ।’

यलया प्रजिअ उपाध्यायं २५ म्हसिबें अप्वः मनूत छगू हे थासय् मुने मदइगु नं जानकारी ब्यूगु दु । वं धाःगु दु, ‘सार्वजनिक यातायातय् मास्क व सेनिटाइजर अनिवार्य यानागु दु । राजनीतिक, आर्थिक व सामाजिक गतिविधि, भ्वय्, ब्याहा, ब्रतबन्ध यायेबलय् २५ म्हसिबें अप्वः मुने मदइगु व पूर्वनिर्धारित ज्याझ्वः दुसा सम्बन्धित जिल्ला प्रशासन ज्याकुथिपाखें अनुमति कायेमाःगु व्यवस्था यानागु दु । माघ ७ गतेनिसें सार्वजनिक सेवाय् तकं खोप कार्ड अनिवार्य यानागु दु । भीडभाड म्हो याकेगु सन्दर्भय् थुकियात स्मार्ट लकडाउन धाःसां ज्यू ।’

उपाध्यायं जनस्वास्थ्य मापदण्ड पालनाय् लापरवाही जुयाः वयाच्वंगुलिं संक्रामक रोग ऐन कथं सुरक्षाकःमि परिचालन यानागु नं धाःगु दु । वं धाःगु दु, ‘हलिंन्यंकं ओमिक्रोन भेरियन्टया संक्रमण उच्च गतिं ब्वलनाच्वंगु दु । स्थानीय प्रशासनं आदेश व निर्देशन बियाच्वंगु जूसां नं जनस्तरय् पालना कमजोर जूगुलिं उकियात थप कडाई यायेत्यनागु खः । माघ १५ गतेतक फुक्क कथंया शिक्षण संस्था भौतिक रुपं बन्द जूगु दु । जनस्वास्थ्य मापदण्ड पालनाय् लावरवाहीया घटना जुइके मबिइत संक्रामक ऐन कथं सुरक्षाकःमि परिचालन यानागु दु ।’

Categorized in राष्ट्रिय