prabhu baink new

स्वनिगलय् समुदाय दुने हे ब्वलन कोरोना

नेवा: अनलाइन न्युज – ललेन्द्र शाक्य | २०७७ भाद्र १८, बिहिबार ११:२०:४८

अस्पताल व वासः यायेगुलि कोरोना संक्रमण व्यवस्थापनय् दुथ्याःपिं विज्ञपिन्सं स्वनिगलय् समुदाय दुने हे कोरोना संक्रमण जुइधुंकूगु धाःगु दु ।

स्वनिगःया थीथी थासय् छेँजः हे संक्रमित जूगु व अस्पतालय् परीक्षण याःपिंमध्ये आपासिके संक्रमण पुष्टि जूगुलिं कोरोना समुदाय दुने हे ब्वलनेधुंकूगु इमिसं जानकारी ब्यूगु दु ।

स्वनिगःपाखें परीक्षण यायेत शुक्रराज सरुवा रोग अस्पताल टेकुइ थ्यंकूपिं प्यम्हमध्ये छम्हेसिके कोरोना संक्रमण खनेदयाच्वंगु अस्पतालं जानकारी ब्यूगु दु ।

अस्पतालं न्हिथं ३०० नमूना परीक्षण यानाच्वंगु दु । वमध्येपाखें आइतवाः ५७, मंगलवाः १३२ म्हेसिके संक्रमण खनेदूगु खःसा बुधवाः ६६ म्हेसिके पुष्टि जूगु खः । नमूना ल्याः कथं संक्रमित ल्याः प्रति प्यम्ह परीक्षण जूपिंमध्येपाखें छम्हेसिके पोजेटिभ खनेदूगु अवस्था खः ।

ज्वरो वइगु, सेखँ मुसु वइगु, ककु स्याइगु व झाडाबान्ता जुइगु मध्ये छुं छगू समस्या दुम्ह मनू, अस्पतालय् शल्यक्रिया यायेगु प्रक्रियाय् दूगु, अस्पताल भर्ना प्रक्रिया लिसेंया मनुखय् परीक्षण यायेबलय् थुज्वःगु परिणाम वइगु जुयाच्वंगु अस्पतालया निर्देशक डा. सागर राजभण्डारीं धाःगु दु ।

गुलिखे छेँजःया फुक्क दुजः हे संक्रमित जुइगु जुयाच्वंगु अस्पतालया निर्देशक डा. सागर राजभण्डारीं धाःगु दु । वया कथं गुलिखे छगू हे छेँजःया १४ म्हेसिके तकं संक्रमण लुयावःगु दु ।

राष्ट्रिय इपिडिमोलोजी व रोग नियन्त्रण महाशाखा स्रोतया कथं येँया भुइजःसि, तोखा, कपन लिसेंया क्षेत्रय् छेँजः हे संक्रमित जुयाच्वंगु दु । छवाः थुखे थुज्वःगु तीव्र संक्रमण खनेदयावःगु महाशाखां जानकारी ब्यूगु दु ।

(थौं बिहिवाः पिदंगु नागरिक न्हिपौपाखें)

Categorized in पत्रपत्रिका