नेवा: अनलाइन न्युज – ललेन्द्र शाक्य | २०७७ चैत्र १२, बिहिबार १४:०१:३५

स्वनिगःया सार्वजनिक थासय् मास्क अनिवार्य याःगु दु । स्थानीय प्रशासनं निर्देशन जारी यानाः स्वनिगःया येँ, यल व ख्वपया सार्वजनिक थासय् अनिवार्य रुपं मास्क तयेत इनाप याःगु खः ।

ज्लाखला देय् भारतय् कोरोना संक्रमण अप्वयाः वयाच्वंगुलिं नेपालय् तकं अप्वयेफूगु संकेत खनेदयेधुंकाः प्रशासनं मास्क तयेत व स्वास्थ्य सुरक्षा मापदण्ड पालना यायेत इनाप याःगु खः ।

जिल्ला प्रशासन ज्याकुथि येँपाखें भारतय् अप्वयाः वयाच्वंगु कोरोना संक्रमणया लिच्वः कथं स्वनिगलय् तकं अप्वयाः वयाच्वंगुलिं सार्वजनिक यातायातय् च्वनेबलय् अनिवार्य रुपं मास्क तयेत, स्यानिटाइजर व सामाजिक भौतिक दूरी कायम यानाः स्वास्थ्य मापदण्डयात पालना यायेत आग्रह याःगु दु ।

अथेहे, सार्वजनिक थासय् भीडभाड मयायेत व छेँ दुने हे होली म्हितेत प्रशासनं इनाप याःगु दु । थ्वहे झ्वलय् बुधवाः यलय् च्वंगु जिल्ला कोभिड १९ संकट व्यवस्थापन केन्द्रया बैठकं कोरोना संक्रमण अप्वयेके मबिइत स्यानिटाइजर, मास्क व सामाजिक दूरी कायम यायेगु लिसेंया मापदण्ड पालना यायेत कडाई यायेगु निर्णय याःगु दु ।

सहायक प्रमुख जिल्ला अधिकारी ललितकुमार बस्नेतं पिने पिहाँ वयेबलय् मास्क मतःसे वइपिन्त संक्रामक ल्वय् ऐन २०२० कथं कारवाही यायेगु निर्णय जूगु जानकारी ब्यूगु दु ।

अथेहे, यलय् रात्रीकालीन व्यवसाय बहनी ११ ता ईलिपा संचालनय् रोक तयेगु, व्यवसाय संचालन यायेबलय् भीडभाड मजुइगु व स्वास्थ्य व सुरक्षाया क्वःछिनातःगु मापदण्डत पालना यायेमाःगु व्यवस्था मिलेयायेत प्रशासनं इनाप याःगु दु ।

जिल्ला प्रशान ज्याकुथि ख्वपं नं भीडभाड मजुइगु कथं छुं नं कथंया मेला, जात्रा, सांस्कृतिक ज्या मयायेत इनाप याःगु दु । अथेहे, न्हापा संचालनय् वयाच्वंगु क्वारेन्टिन, आइसोलेसन केन्द्रयात तयारी अवस्थाय् हयेत नं प्रशासनं निर्देशन ब्यूगु दु ।

(दृष्टि वाःपौपाखें)

Categorized in राष्ट्रिय