prabhu baink new

स्वनिगलय् मनूत अप्वल, कोरोना गांगामय् थ्यनीगु ग्याःचिकु

नेवा: अनलाइन न्युज – ललेन्द्र शाक्य | २०७७ आश्विन २०, मंगलबार ११:३३:२९

मोहनी नखःया पूर्वसन्ध्याय् स्वनिगःपाखें पिहाँ वनीपिं व गामं स्वनिगलय् दुहाँ वइपिनिगु ल्याखय् बृद्धि जुइगु जुयाच्वंगु दु । स्वनिग: दुहाँ वइगु नाकापाखें न्हिथं ४,८०० निसें ५,००० तक सवारीसाधन दुहाँ वयाच्वंगु दु ।

वहे ल्याखय् न्हिथं सवारी साधनत पिहाँ वनाच्वंगु दु । विगतया दँय् मोहनी वयेन्ह्यः १५ न्हु न्ह्यःनिसें हे ५० हजारनिसें ६० हजारतक न्हिथं स्वनिगः त्वःताः वनीगु खः । तर थुगु दँ न्हिथं १६ हजारनिसें १८ हजारतक मनूतसें स्वनिगः त्वःताः वनाच्वंगु दु ।

महानगरीय ट्राफिक महाशाखाया प्रमुख एसएसपी भीम ढकालया कथं छुं दिंनिसें स्वनिगलय् दुहाँ वइपिंसिबें पिहाँ वनीपिनिगु ल्याः अप्वयाच्वंगु दु । तर थ्व ल्याः शनिवाःया जूगु व थ्व वा नियमित रुपं ल्याः गणना यायेधुंकाः ल्याः बारे सीदइगु एसएसपी ढकालं धाःगु दु ।

छुं दिं न्ह्यःतक न्हिथं स्वनिग त्वःताः वनीपिं सिबें दुहाँ वइगु ल्याखय् बृद्धि जूग खःसा आः पिहाँ वनीपिनिगु ल्याः अप्वःगु दु धकाः ढकालं धाःगु दु । ढकालया कथं आः स्वनिग दुहाँ वइगु व पिहाँ वनीगु सवारी साधनया ल्याः बराबर थें हे खनेदूगु जूसां नं पिहाँ वनीगु सवारी साधन ल्याः छुं दिंनिसें अप्वःगु दु ।

आः न्हिथं ४,८०० तक स्वनिगलय् सवारी साधन दुहाँ वयाच्वंगु दुसा वहे ल्याखय् स्वनिगलं पिहाँ वनाच्वंगु दु । न्हापाया दँय् थ्व इलय् न्हिथं ६० हजार मनूत स्वनिगः दुहाँ वइगु व ६० हजार पिहाँ वनीगु जूगु खः ।

(गोरखापत्र न्हिपौपाखें)

Categorized in पत्रपत्रिका