nepal investment baink

स्वनिगः छाय् संकटग्रस्त घोषणा यात ?

 – विजयकृष्ण श्रेष्ठ

भुखाय् ब्वयाः संकटग्रस्त जूगु ला लत्यां मल्याये धुंकल । स्थिति सामान्यीकरण जुजुं वनाच्वंगु दु व सामान्यीकरण यायेमाल धकाः हालाः सना जूगु नं दु, तर सामान्य स्थिति जुल धकाः घोषणा यायेगु ला गन खः गन अःखःवतं स्वनिगःयात संकटग्रस्त क्षेत्र घोषणा यानाः सरकारं सकसितं अजूगति चायेकाबिल ।

वास्तवय् स्वनिगःयात संकटग्रस्त क्षेत्र धकाः घोषित याःगुया रहस्य छु खः ? छु दाता सम्मेलन जुइत्यंगुलिं जक अथे धाःगु खःला ? तर दाता सम्मेलन यायेगुलिसे थुगु खँया छुं सम्बन्ध दइगु खनेमदु ।

वास्तवय् स्वनिगःयात संकटग्रस्त क्षेत्र धकाः घोषित याःगु ला थन भुखाय् ब्वयेधुंकाः गुकथं लाःथेपाःथे ज्या जुल, उकिया औचित्य सिद्ध यायेत हे खः ।

थुथाय् राहतया निंतिं वःगु जस्तापाता येँय् हयाः मीत स्वःम्ह अर्थमन्त्रीया तत्कालीन पीएया तर्क न्ह्यथनेबहःजू ।

छु धात्थें ऐननियमकथं ज्या यानाच्वनेगु धइगु खःसा धात्थेंयाम्ह पीडितया थाय् राहत थ्यनी ला धइगु वयागु तर्क खः । तर्क धइगु तर्क जक मखु, थुकिं नियतयात नं स्पष्ट याइ । हानं थ्वहे तर्क ला वं तर्क यायेसिकं न्ह्यः सरकार चले यानाच्वंपिसं बांलाक्क हे स्यू, अले इमिसं उकिया नं व्यवस्था यानातःगु दु – संकटग्रस्त क्षेत्र धकाः घोषणा यायेगु । गथेकि संकटग्रस्त अवस्था घोषण जुल धाःसा संविधानसभाया म्याद नं तनेज्यूगु धइगु प्रावधान दु । सामान्य अवस्थाय् नियम पुरे यायेमाः, तर विशेष अवस्था वा संकटग्रस्त अवस्थाय् संकटया सामना यायेगु धकाः नियम स्वयाच्वनेम्वाल । गुखेगुखेछिं उखेउखें याःसां जिल ।

भुखाय्या सम्बन्धय् गुलि राहत वल व गन गन गुलि वितरण जुल धकाः संसदया सार्वजनिक लेखा समितिं निर्देशन बीधुंकूगु दु । विवरण ला तयार यानाः बीफु, तर थ्व विवरणया विधि व प्रक्रिया छु ? औचित्य छु ? गुगु नियम कानुनकथं थुकिया वितरण जूगु खः ? द्वःछि दां परिवहन खर्च जुइगु थासय् झिद्वः दां छाय् जुल ? थुज्वःगु कथंया खँत दु, दइ व थ्वहे खँयात नियमित व स्वाभाविक दयेकेत सहारा कायेगु धइगु ला संकटग्रस्त क्षेत्रया घोषणा हे खः ।

वास्तवय् राहतया विवरण सार्वजनिक लेखा समितियात बीमाः व थुकियात सार्वजनिक नं यायेमाः । सरकारं मनूतसें अनेक कथं हल्ला यानाः सरकारयात बदनाम यायेत स्वत, जनतायात म्हतिंम्हतिं हे थुलि इनेत गात धकाः नं हल्ला यात धकाः नं सरकारं धयाच्वंगु दु । तर सरकारं थुकथं हल्ला याइपिनिगु म्हुतुप्वाः तिकेगु खःसां सरकारं राहतया तथ्यसत्य विवरण पिने हयेमाःगु दु । तर सरकारं थौंतक नं उकथंया विवरण पित हःगु मदु ।

सरकारयात राहत वितरणय् अपारदर्शी व अनियमित जूगु व भुखाचं पिथंगु समस्यायात ज्यंकेत असक्षम व लाचार जूगु द्वपं विपक्षीतसें लगे यानाच्वंगु दु । सरकार स्वयम् हे नं ध्यबा मगात धकाः दाता सम्मेलन सःतेगु ज्याय् जुयाच्वंगु दु । थ्व ज्याय् अर्थमन्त्री डा. रामशरण महत खटे जुयाच्वंगु दु ।

थ्व ई आः देसय् पुननिर्माणया ज्या गुकथं न्ह्याकेगु धइगु व्यापक सहलह दयेकाः न्ह्यायेमाःगु व मुख्यरुपं पुननिर्माण प्राधिकरण  दयेकेमाःगु खः ।

तर पुनर्निर्माण प्राधिकरण ज्या व्यापक रुपं जूसां आःतक नं पुनर्निर्माण प्राधिकरण दयेकेगु ज्या धाःसा जूगु मदुनि । तर संकटग्रस्त क्षेत्र घोषणा यात ।

थुकिं सवाल हानं नं छक्वः नियतया पिहाँ वःगु दु । नियत हे गलत जुल धाःसा नियमया छु खँ जुल ?
वास्तवय् नेपालय् नेतृत्वया नियतया सवालय् न्हापांनिसें हे खँ पिहाँ वयाच्वंगु खः । उज्वःपिनि निंतिं भुखाय् नं छगू अवसर व त्वहःया खँ जुइगु स्वाभाविक जूवन ।