nepal investment baink

स्वनिगःया ७३ प्रतिशत मचापिंके वा किलं नइगु समस्या

नेवा: अनलाइन न्युज – रासस | ने.सं. ११४४ सिल्लागा दसमी (२०८० चैत्र ६ गते) मंगलवाः

स्वनिगः दुने याःगु अनुसन्धानय् ७३ प्रतिशत मचातय्गु वा किलं नइगु समस्या खनेदूगु सीदूगु दु ।

कान्तिपुर डेन्टल कलेज शिक्षण अस्पताल व अनुसन्धान केन्द्रं याःगु ६८ गू स्कूलय् याःगु अनुसन्धानया झ्वलय् ७३ प्रतिशत मचापिंके वा किलं नइगु समस्या खनेदूगु सीदूगु दु ।

विश्व मुख स्वास्थ्य दिवसया पूर्व सन्ध्याय् कान्तिपुर डेन्टल कलेज शिक्षण अस्पतालं पत्रकार सम्मेलन ग्वसाः ग्वयाः लिपांगु ई नेपाःया मचापिंके वा किलं नइगु आपालं जूगु धाःगु दु ।

पत्रकार सम्मेलनय् अस्पतालया प्रमुख कार्यकारी निर्देशक डा. बुद्धिमान श्रेष्ठं मचापिन्सं बांलाक्क ब्रस मयाइगु, बजारय्दइगु तयारी नसाज्वलं नइगु, चक्लेट, विस्कुट लिसेंया चाकूगु नसाज्वलं नइबलय् आपालं मचापिनिगु वा किलं नइगु समस्या खनेदूगु धाःगु दु ।

अस्पतालं बिएम फाउण्डेशन व रोटरी क्लब अफ काठमाडौं नर्थलिसेया सहकार्यस स्वनिगः दुनेया ६८ गू स्कूलय् अध्ययन याःगु खः । मुक्कं २४ हजार १ सय ५४ म्ह विद्यार्थीपिंके याःगु अनुसन्धानया झ्वलय् ७३ प्रतिशत मचातय्के वा किलं नइगु समस्या खनेदूगु खः ।

अस्पतालं थीथी समुदायस वनाः याःगु दन्त शिविरया झ्वलय् वयस्कपिंके ४५ प्रतिशत गिजाया समस्या लुयावःगु डा. श्रेष्ठं धाःगु दु । आः नकतिनि जक उगु अस्पतालं झापा, स्याङजा, काभ्रे पलाञ्चोक, कैलाली, सिन्धुली व नुवाकोटय् दन्त शिविर संचालन याःगु खः ।

Categorized in स्थानिय-समाज