zero media family planning adv

स्वनिगःया चीभाः व चैत्य हलिंया सम्पदा दुने दुथ्यात

नेवा: अनलाइन न्युज | २०७६ कार्तिक १७, आइतबार ११:३२:२५

नेपाः देय् व नेवाः समुदायया नितिं हलिमय् अतिकं गौरवं जाःगु बुखँ पिहाँ वःगु दु । थुगु बुखं यानाः हलिंन्यंकं हे नेवाः संस्कृतिया बेजोड नमूना कथं धस्वानाच्वंगु स्वनिगःया चीभाः व चैत्यया प्रचार प्रसार जूगु दु ।

New York स्थित  World Monument Fund (WMF)पिकागु Watch2020 धलखय् पेरिसया Notre Dame व पेरुया Inca तयगु थाय नापनापं स्वनिगःया चीभाः व चैत्य नं लाःगु दु ।

वर्ल्ड मोणुमेण्ट फण्डं निदँय् छक्वः हलिंन्यंकं च्वंगु २५ गू स्मारकयात थःगु वाच २०२० धलखय् सार्वजनिक याःगु खः ।

थुगुसी हलिमय् च्वंगु थीथी २५० गू प्रस्ताबितमध्ये सम्पदाविद पिनिगु निर्णायक मण्डलं २५ गू सम्पदात बिशेष संरक्षण यानाः तयेमाःगु महत्वपूर्णगु धलः पिकाःगु खः ।

थ्व धलखय् स्वनिगःया चीभाः व चैत्य नं संरक्षण यानाः तयेमाःगु अतिकं महत्वं जाःगु स्मारक व सम्पदा खः धकाः लाकातःगु दु।

चीभा व चैत्य संरक्षण यायेगु नितिं ज्या यानाः च्वनादीम्ह अभियन्ता प्रविण शाक्यं थुगु विषयस धयादी, “पेरिसया नोट्रे दाम, पेरुया ईन्कातयगु माचा पुचुथें जाःगु बिश्व बिख्यात स्मारक नापनापं ज्वलिंज्वः नेपाःया स्वनिगःया सम्पदा चीभा व चैत्यत नं लाकातःगु धैगु नेपाः व नेवाः समुदायया नितिं तसकं गौरवं जाःगु खँ खः । थुकिं याना जिमिसं याना वयाच्वनागु संरक्षणयात अझ अप्वः हौसला ब्यूगु दु।”

प्रविण शाक्यं हाकनं धयादी,  “जिमिसं याना वयाच्वनागु सचेतना ज्याझ्व, चीभाः सुुचुपिचु ज्याझ्वः लिसें  मर्मतया ज्याझ्वः न्ह्याकेत थ्व बुखं यानाः चीभाः व चैत्यया महत्व फुकस्यां थुइकाः हःपाः बिइ धैगु भलसा कया च्वना ।”

–अमर तुलाधर

Categorized in अन्तर्राष्ट्रिय