newayatataad 2

स्वतन्त्र संसारं न्ह्याकूगु फेसबुक लाईभ सांगितिक ज्याझ्वः समापन मंसीर १९ गते

नेवा: अनलाइन न्युज – ललेन्द्र शाक्य | २०७७ मङ्सिर १४, आइतबार १४:००:२२

म्ये संगीतया विकास लिसें संगीतकःमिपिन्त हःपाः बिइगु आज्जु कोरोना महामारीया इलय् संगीतया माध्यमं कोरोना संक्रमणया ग्याःचिकुपाखें तापाक्क च्वनेत व च्वनेगु लिसें च्वंकेगु आज्जुं थ्यंमथ्यं झिंस्ववाः (१३ हप्ता) न्ह्यःनिसें यलया खोनाया नांजाःम्ह कलाकःमि स्वतन्त्र संसार महर्जनं थःगु फेसबुक आइडीपाखें थीथी संगीतकःमिपिनिगु सांगितिक लाईभ ज्याझ्वः न्ह्याकादीगु खः । थुगु ज्याझ्वः संगीतह्यःमिपिनिगु दथुइ अतिकं लोकं नं ह्वाःगु खः ।

आः वयाः थ्वहे वइगु ने.सं. ११४१ कछलागा चतुर्थी (मंसीर १९ गते) शुक्रवाः थुगु लाईभ सांगितिक ज्याझ्वःया समापन ज्याझ्वः जुइगु जानकारी कलाकःमि स्वतन्त्र संसार महर्जनं नेवाः अनलाइनन्यूजयात जानकारी बियादीगु दु ।

वइगु शुक्रवाः सुथसिया ११ः३० ता ईनिसें न्ह्याइगु जानकारी बिसें कलाकःमि महर्जनं थुगु समापन ज्याझ्वः यलया रिंगरोडय् च्वंगु बेखाज् पार्टी भेन्युइ जुइगु जानकारी बियादीगु दु ।

संगीत ख्यलय् नांजाःपिं संगीतकःमिपिन्त वाःया प्रत्येक शनिवाः फेसबुक सांगितिक लाईभ ज्याझ्वः न्ह्याकाः संगीतकःमिपिन्त हःपाः बिइगुया लिसेलिसें स्वकुमि व न्यनामिपिन्त सांगितिक सवाः बियाः कोरोना महामारीयात ल्वःमंकेगु कथं ज्याझ््वः जूगु खः । आः उगु लाईभ ज्याझ्वलय् ब्वति कयादीपिं संगीतकःमिपिन्त दसिपौ लःल्हायेगु ज्याझ्वः तयाः समापन यायेगु ज्याझ्वःया ग्वसाः ग्वःगु खः ।

कलाकःमि स्वतन्त्र संसार महर्जनं धयादी, समापन ज्याझ्वलय् फेसबुक सांगितिक लाईभ ज्याझ्वलय् सहभागी संगीतकःमिपिन्त दसिपौ लःल्हायेगु ज्याझ्वःया लिसेलिसें सागितिक ज्याझ्वः नं जुइ । कोरोना संक्रमण महामारीया अवस्था आः भच्चा सामान्य जूगु इलय् सामाजिक दूरी कायम यानाः सीमित सहभागी जक यानाः ज्याझ्वः न्ह्याकेगु ग्वसाः ग्वयागु दु ।

संसार क्रियसन्सपाखें व्यवस्थापन यानाः संसार अनलाइन टिभीया ग्वाहालिं उकथं फेसबुक सांगितिक लाईभ ज्याझ्वः न्ह्याःगु खः । लिसेलिसें उगु ज्याझ्वःयात थीथी संघसंस्थापाखें ग्वाहालि याःगु दुसा ज्यापु सःपाखें साउण्ड सिष्टम ग्वाहालि याःगु खः ।

मंसीर १९ गते सकल संगीतकःमि लिसें कलाकारपिन्त यलया रिंगरोडय् च्वंगु बेखाज् पार्टी भेनुइ सहभागिताया नितिं कलाकःमि स्वतन्त्र संसार महर्जनं इनाप यानादीगु दु ।

Categorized in कला