zero media family planning adv

स्वकुमिपिं लयताःगु हे तःधंगु अवार्ड खः रामकृष्ण खड्गी, निर्देशक

(रामकृष्ण खड्गी, थौंकन्हय् नेपालभाषा संकिपा ख्यलय् अतिकं बय्बय् जुयाच्वनादीम्ह छम्ह संकिपा निर्देशक खः । वय्कलं बौद्धकालीन बांखया लिधँसाय् निगू संकिपा दयेकादीगु दु । छगू अवार्ड त्याकेत ताःलाःगु संकिपा ‘पटाचारा’ खःसा मेगु आः गुण सिनेमा हलय् क्यनेज्या जुयाच्वंगु संकिपा ‘कृषागौतमी’ खः । थुगु निगुलिं संकिपायात स्वकुमिपिन्त अतिकं बांलाः तायेकूगु दु । खय्तला भाजु रामकृष्ण खड्गी छम्ह म्येच्वमि, संगीतकार, म्येहालामिलिसें छम्ह ख्यालःम्वः नं खःसा म्यूजिक भिडियो निर्देशक व छम्ह एमएम संचालक आर.जे. नं खः । वय्कलं यलया साम अडियो भिडियो प्रोडक्सनपाखें पिथंगु ख्यालिन्हिलि मुनाः ‘आया बाबा प्वाः स्यात’, ‘इतिइति’या नं निर्देशन यानादीधुंकूगु दुसा आपालं ख्यालः नाटक नं निर्देशन यानादीगु दु । वय्कःलिसे थीथी विषयस यानागु खँल्हाबल्हाया छुं सार थन न्ह्यब्वया च्वना । –सं. )


दकले न्हापांला बुद्धकालीन बाखनय् छिस्करं दयेकादीगु कृषागौतमी पिदंगु लसताय् भिन्तुना । बुद्धकालया तसकं बांलाःगु बाखंमध्ये छपू बाखं कथं कयातःगु थ्व संकिपा पिदनेधुंकाः स्वकूमितय्गु प्रतिक्रिया छु दु ले ?

पक्का नं खः, थ्व बाखं तसकं बांलाःगु, उकिं थ्व बाखंपाखें सुयात निरास मजुइमा धकाः विचाः यानाः थ्व संकिपा दयेकाःगु खः । आः बाखं जम्मा प्यंगू लाइनया खः, थ्व लाइन दुने च्वनाः प्याखं दयेकेगु धाःगु नं चीधंगु खँ नं मखुत, संकिपा स्वये धुंकाः ९५ प्रतिशत स्वकुमिपिन्सं पोजेटिभ खना ।



कृषा गौतमी सिबें न्हापा पटाचारा दयेका दिल । पटाचारा नं छपू बुद्धकालीन बाखं हे जुल । छिगु पलाः बुद्धकलीन संकिपापाखे जक न्ह्याइगु खः ला कि छु ?

निगुलिं संकिपा बुद्धकालीन जूगुलिं जक अथे ताःगु खः, अफर ला मेगु नं वयाच्वंगु खः, विचाः यायां निगूगु संकिपा नं बुद्धकालीन हे लात का । अथे जूगु खः ।

 पटाचारा ला लगातार सच्छिन्हुसिबें अप्वः न्हितक क्यनाः छगू न्हूगु रेकर्ड तयेत ताःलात । अले राष्ट्रिय चलचित्र अवार्डय् नं स्वंगू स्वंगू सिरपाः त्याकूगु संकिपा खःसा आः कृषा गौतमी पाखें छिं गज्याःगु आशा याना दियाले ?

थ्व अवार्ड धयागु ला लिपाया खँ खः, जिं संकिपा व मेमेगु छुं नं (म्ये, ख्यालः) यायेबलय् दकलें न्हापां स्वकुमिपिन्त ध्यानय् तयाः दयेकेगु खः । स्वकुमिपिं लय्ताल वा लुधनकि व हे जिगु लागिं तःधंगु अवार्ड खः । खः, लिपा हाकनं अवार्ड लातकि झन लयेता वइगु स्वाभाविक हे खः ।

 पटाचारा संकिपाय् नं वसः तिसाः व बस्तीया लकस बुद्धकालीन पहः मवल धकाः धाःपिं पिहाँ वःगु खःसा कृषा गौतमी संकिपायात कया नं हाकनं अज्याःगु हे खँ न्यनेदु । थुकिया बारे छु धयादी ले ?

पक्का नं वसः, तिसा बुद्धकालीन पहः मवः, अले जिं बुद्धकालीन खः धकाः नं मधया । संकिपा स्वयेबलय् न्ह्यःनेनिसें स्वयाबिइ माल । जिमिसं उके च्वयाः हे तयागु दु, थ्व संकिपाय् छ्यलागु फुक्कं वसः, तिसा अझ भाय् तक नं काल्पनिक खः धकाः...दथुइ वनाः संकिपा स्वया अथे धाइपिन्त आः छु धायेगु ग्व ?

बुद्धकालीन बाखं जक ल्ययादियागुया कारण छु खः ले ?

जिं न्हाच नं धया, यक्व अफर वयाच्वंगु खः धकाः । निगू संकिपा नं बुद्धकालीन दयेकागुलिं जक थथे ताःगु खः, अले जितः बुद्धकालीन बाखं यःगुलिं नं खः ।

 छि ला छम्ह रेडियो उद्घोषक नं खः । ख्यालःम्वः नं खः । म्यूजिक भिडियो डिरेक्टर नं खः । थज्याःगु आपालं ख्यलय् दक्षता दुम्ह छिं संकिपा निर्देशनय् नं ल्हाः तयादिल । थुकिया हुनि छु खः ले ? गनं छितः थः तसकं हे सःस्यूम्ह धकाः क्यनेगु जकं मन दूगु खः ला कि ?


मखु, अथे सःस्यूम्ह तायाः मखु । छिं गुलि नं विधाय् जिगु ल्हाः न्ह्यानाच्वंगु खँ कनादिल, व चाहिँ पक्क नं खः । फुक्क ज्यात यायेसया मखु कि सयेकेगु कुतलय् जक जुयागु खः । मेगु नेपालभाषाया फुक्कं ज्याय् हःपाः तिबः बिइमाल धकाः सःथें मसःथें जक लाःवंगु खः । बस् सःस्यूम्ह जुया चाहिँ पक्का नं मखु । अय्नं जिगु फुक्कं ज्याय् छिकपिन्सं मतिना यानादिल ।

 संगीत ख्यलय् औपचारिक अध्ययन यानादीम्ह छि, छिगु पलाः थौंकन्हय् उखेपाखे उलि खनेमदुनि । गनं माया जकं मारे यानाः दियागु खः ला कि ?

थःगु दकले न्हापांगु विधाःयात नं अथें ल्वःमंकीला ? झन न्हापा स्वयां यक्व पलाः न्ह्यानाः च्वन का । जिगु याकः सोलो म्येचाः ‘तः वयाच्वंगु दु’, ‘चटाचारा’ य् नं जिगु म्येग्वः व कम्पोज खः । अथेहे, ‘कृषागौतमी’इ नं जिगु हे म्येग्वः व कम्पोज खः । मेमेपिनिगु कलेक्सन एल्बमय् नं ज्या यानाच्वनागु दु । झन धकाः अप्वः जुयाच्वनागु दु ।



 थन दच्छियंकं छगू नेपालभाषा संकिपा महोत्सव जुयाच्वंगु ला छिं स्यू हे जुइमाः । उकी कृषा गौतमी बिया मद्यू धइगु न्यनेदु नि । छाय् बिया मदियागु थें ?

आः स्वयादिसँ, संकिपा समाजं जितः महोत्सवया बारे धाःबलय् कृषागौतमीया प्रिमियर शो हे मजूनि, अले गुबले यायेगु तिथिमिति नं फिक्स मजुनिगु, अले मेगु खँ थ्व संकिपाया डिरेक्टर जक जि खः, निर्माता मखु । निर्मातायाथाय् खँ थ्यंकाः बियागु खः, वय्कलं न्हापा प्रिमियर याये, लिपा विचाः याये धयादीगु खः । संकिपा समाजयात नं जिं थथे हे धया ।

 नेपालभाषाया संकिपा ख्यः थौंकन्हय् गन थ्यनाच्वंगु धइगु खँय् छिगु छु विचाः दु ?

धात्थें धायेगु खःसा नेपालभाषाया संकिपा ख्यः बांलानाः च्वंगु मदु । २८, २९ दँ न्ह्यः हे सेल्यूलाइड फिल्म सुरु याःगु झीगु संकिपा झनझन विकास जुइमाःथाय् झनझन स्तर कुहाँ वनाच्वंगु खना । क्वालिटी स्वयां अप्वः झीसं क्वान्टिटीलय् बः बियाच्वना ।



 थ्व संकिपा ख्यलय् च्वनाः ल्हाः म्हुतु चूलाइ मखु धकाः धाइपिं नं दु, तर छि थेंज्याःपिं गुलिखे संकिपाकःमिपिं निरन्तर लगे नं जुयाच्वंगु दु । थुकियात छिं गुकथं विश्लेषण यानादी थें ?

खः, न्हापा जूसा छिं धयादीगु पाय्छि खः । तर आः ई अथे मखु । झीगु प्रोडक्ट क्वालिटी दुसा, पारिश्रमिक बिइपिं नं यक्व वयाच्वंगु दु । उकिं न्हापां बांलाक्क ज्या याइ धकाः विश्वास बिइफयेके माल ।

छिगु कला यात्रा गुकथं न्ह्यात । छक्वः कनादीला थें ?

जिं न्हाचः नं धया, नेपालभाषाया छुं नं ज्याय् ब्वति कायेगु झ्वलय् मचायेकं जक लाःवनाच्वंगु खः । लिपा लिपा यायां वंलिसे नसाथें जूवन । आः ला झन झीसं मयाःसा सुनां याइ धकाः नुगलय् लुइगु, अले ला छु माल...न्ह्यानातुं च्वना का । मेगु थःगु इन्ट्रेष्ट नं खः ।

आः छिगु भविष्यया योजना छु दु ले ?

थ्वहे खः, थःम्हेसं फत्तले थ्व हे ख्यलय् पलाः न्ह्याकाः, थःगु मांभाय्या सेवा यानाः च्वनेगु ।

 दकले लिपा, नेवाः अनलाइनन्युजपाखें ब्वनामि व स्वकुमिपिन्त छुं धायेगु दनि कि ?

नेपालभाषाया छुं नं ज्याय् हःपाः तिबः बियादिसँ । नेपालभाषाया संकिपात बांलाः कि बांमलाः धकाः न्यनाः, बांलाःसा जक स्वः झासँ । थथे बानी यानादिल धाःसा संकिपा दयेकीपिं जिपिंथें जाःपिन्सं मेहनत यायेगु कुतः यानाच्वनी । सुभाय्, जिगुपाखें नं नेवाः अनलाइनन्युजयात ।