नेवा: अनलाइन न्युज – Bijay Ratna | २०७९ बैशाख ११, आइतबार ०९:५६:०७

वास्तुकला ज्ञाता, वरिष्ठ चित्रकार व भ्वाइलेन गुरू हरिप्रसाद वैद्यं नेपालमण्डल कला व संस्कृतिया धनी देश जूसां  नेवाः तजिलजि व कलाया अवहेलना जुया च्वंगु दु धकाः धयादिल । स्रष्टा वैद्य नेपाःया संगीतयात भारतीय संगीतया छगू अङ्ग धकाः ब्वलंका तःगु भ्रम चिइकाः नेपाःया संगीत यूरोप, अमेरिका व अष्ट्रेलिया थ्यंकेगु ज्याया न्ह्यलुवाः खः ।

नेपाःया संगीत यूरोप, अष्ट्रेलिया, चीन व भारतय् न्ह्यब्वया नेपाःया म्हसिका देश विदेशय् थ्यंकेत यानादीगु योगदानयात लुमंकुसे शनिवाः नेवाः ग्वाहालि पुचः पाखें सम्मान याःगु खः ।  

संगीतज्ञ, भ्वाइलेन गुरु, सम्पदाया ज्ञाता, चित्रकला च्वयादीम्ह वरिष्ठ कलाकार भाजु हरिप्रसाद वैद्ययात संङ्घीय मामिला व सामान्य प्रशासनमन्त्री राजेन्द्रप्रसाद श्रेष्ठपाखें दोसल्लां न्ययेकाः हनेज्याझ्वः जूगु खः ।  

वय्‌कः स्रष्टाया एकल चित्रकला प्रदर्शनी ज्याझ्वः उलेज्या नं मूपाहाँ मन्त्री श्रेष्ठं यानादिल । सम्मान ज्याझ्वःया नापनापं नेवाः ग्वाहालि पुचः नेपाः १३ व १५ वडा येँया ग्वसालय्  बैशाख १०, ११ व १२ गते स्वन्हुयंकं नेपाल कला परिषद, बबरमहलय् वयकलं सृजना यानादीगु चित्रकला प्रदर्शनी न्ह्यागु दु ।

सम्पदा निर्माणय् सम्पदा व वास्तुकलाविद्या ज्वःमदुगु भूमिका निर्वाह यानाच्वनादीम्ह वयकः ने.सं. १०५७ य् जन्म जुउगु खःसा वयकः आः ८५ दँ दयेधुंकूगु दु।

भ्वाइलिन गुरु कथं बिस्कं म्हसिका दुम्ह सर्जक बैद्यं स्यनातःपिन्सं उगु ज्याझ्वलय् भ्वाइलन संगीत प्रस्तुति व चित्रकला प्रदर्शनी न्ह्यब्वःगु खः ।

Categorized in कला